zur Navigation springen
So spricht Schleswig-Holstein

20. September 2017 | 04:19 Uhr

100 Sekunden Platt : Wiehnachten

vom

Marianne Ehlers erinnert an Kinderzeiten mit einem Gedicht von Hermann Claudius.

shz.de von
erstellt am 23.Dez.2011 | 03:20 Uhr

Wi kennt dat all, düt Geföhl, dat jüst ann Hilligavend op eenmal dor is. Dat is dat Denken an Fröher, an de egen Kinnertiet. Wi besinnt uns an de Festdaag mit uns Öllern un Geswister, an dat Eten un an de Geschenke - un vun achtern ankeken is dor en lütten Hilligenschien över düsse Tiet, meist so een, as dat Jesuskind em hett.
Un denn denkt wi an Wiehnachten mit uns egen Kinner, de nu al groot sünd. Weer doch schöön ümmer, denkt wi - un mitünner is dor denn ok so en Klümp in de Hals.

Hermann Claudius: "Wiehnachten"
Ok de Dichterslüüd kennt dat - un se hebbt schöne Wöör för düssen Tostand, för düt Föhlen, un dorüm höört wi ehr Gedichten jüst vundaag so geern. Hermann Claudius sien "Wiehnachten" schall uns nu mitnehmen - rin in den Hilligen Avend, an düssen Dag, an den wi geern mal an Fröher denken möögt:
Vör Wiehnachten warrt mi so egen to Sinn:
Ik loop ut uns Tiet in mien Kinnerjohrn rin.
Wiehnachten!
Wat lütt weer de Welt - man deep as en Droom.
Un avens keem Vadder mit n Dannenboom.
Wiehnachten!
Weg! - reep he luuthals - Wahrt to! Geswind!
Kniept de Ogen to, sünst warrt ji jo blind!
Wiehnachten!
Un ik krööp mi woll liesen ant Slötellock.
Man de Slötel de steek vun binnen op.
Wiehnachten!
Un denn süngn wi int Bett dat Leed vun Marie
un dat Jesuskind. Un denn slöpen wi.
Wiehnachten!
Ik kann mi dat Leed meist noch singen hörn -
Och - wern wi doch alltohoop wedder Görn!
Wiehnachten!

Hartlich Wiehnachtsgröten un en wunnerboren Hilligavend vun Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen