100 Sekunden Platt : Wedder mal Wacken

Gerne wäre Marianne Ehlers mal dabei, aber vielleicht ist die Schwermetall-Musik auf dem Wacken Open Air doch nicht das Richtige.

Avatar_shz von
25. Juli 2013, 06:19 Uhr

Ach, düsse wunnerbore Musik... so swöögt mien Söhn ok düt Johr wedder. Heavy Metal op un dal - un dat vunt Feinste! Wegen de Grupp Rammstein fohrt he düt Johr hen, verkloort he mi. De feine Musik dörv een op gor keenen Fall verpassen. Na denn man to!
Un denn fang ik an to spikeleren: also, de Fire Fighters müch ik mi ja ok to geern mal anhören - blots dorüm de düre Koort? Dat verlohnt sik ja ok nich. Mien Söhn winkt af, is sounso allens utverköfft, meent he.
Ik kunn ja mal na Wacken fohren un mi de Musik ut de Feern anhören. Luut noog is se ja. Man dat is seker ok blots de halve Spaaß.

Un, Rammstein will ik ja villicht doch nich so geern hören. Man kiek - Santiano is dorbi, kloor, de sünd ja jüst so in e Mood. Denn kunn ik mi dat ja noch överleggen, denn an düsse noordschen Jungs harr ik woll Spaaß an!
Un wat gifft dat noch so int Programm? Ik kiek int Nett un finn Airbourne, de warrt kamen. Denn noch Blind Guardian - ach kiek, un Motörhead, de kenn ik. Tominnst hett mien Söhn mi dorvun vertellt.
Un wedder rekent de Veranstalters mit üm un bi 72.000 Besökers in Saken Swoormetall. Dat warrt ja wedder richtig afgahn, denk ik mi so. De armen Köh in Wacken, de mutt een ja meist de Ohren tostöpseln, anners warrt de Melk suer. Heff ik mi nich utdacht den Snack, heff ik op de Wackensiet int Nett leest. Gefallt mi aver goot.
Un wat mi noch gefallt? Na, düsse swarten Büdels, de jedereen kriegen deit. Dor is denn en Müllsack in, Opklevers, en Kuli, en Regencape, en lütten Wimpel un all son Kraam. Ach ja, un denn noch so en lütt Pappdings, dat utsüht as dat Neihtüüch ut en Hotel. Is aver heel wat anners binnen...
Gröten, vergnöögt un luut, vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen