zur Navigation springen

100 Sekunden Platt : Water, Wind un Badebüx

vom

Ein Familientag am Strand mit Wasserball, Sonnencreme und Picknick auf der Luftmatratze - Marianne Ehlers ist dabei.

shz.de von
erstellt am 26.Jul.2013 | 12:47 Uhr

Is dat nich fein? Sommer is dat in uns Land - is ja meist nich to glöven! Ik heff Urlaub, ik freu mi as dull, man en beten länger Henkieken op Konto un en kort Rinschulen int Portemonai seggt mi glieks: en richtig schöne lange Reis is nich binnen in düt Johr.
Man dor kaamt de Kinner an un muult: dat is langwielig, se weet nich, wat se maken schöllt, de Frünnen sünd all na de Türkei un na Malle afsuust mit de Öllern ... blots se armen Stackels sünd noch tohuus.
"Ach Kinnerslüüd", seggt wi, "nu laat uns doch mal en Ogenblick in Roh. Wi överleggt uns wat".

Un denn biet wi in den suren Appel: wi fohrt an den Strand! Mit Sack un Pack, mit Badebüx un Bikini, mit Waterball un Swemmflögels, mit Sünnencreme un Strohhoot. Un mit Eten un Drinken, un denn noch de Strandmuschel gegen den Wind, oha!
Endlich sünd wi dor. Wi maakt uns allens torecht - de Kinner sünd al weg, glieks int Water jumpt. Wi smeert uns erstmal mit Sünnencreme in, is ja wichtig hüütodaags. Bi all de Ozonlöcker! En Ogenblick later sünd de Kinner wedder dor, se hebbt Smacht un Döst. Goot, denn warrt eerstmal en Strandpicknick maakt. Wi eet kole Wüst un Paprikastücken, Meterbroot un Keeshappens. Seeluft maakt Appetit! Ton Glück hebbt wi ok en poor Buddeln Beer inpackt.
"Ach, dat is doch Urlaub!" swarm ik, dor stött mien Jüngsten de Beerbuddel üm. De ganze schöne brune Droom verlöppt sik inn Sand.
Un mien Luftmatratz is nu ok kleevig un schietig. Sien grote Swester schimpt mit em un maakt Larm för dree. "Haut af, weg mit jem int Water!" "Blots, wenn wi Geld för en Ies mitkriegt!"
Dor schall dat ja nu nich an liggen. Wi wöhlt na uns Portemonai - un finnt dat nich. Na en lange Simmeleren fallt uns in, dat wi dat wohrschienlich tohuus op den Kökendisch liggen laten hebbt. Oder doch nich? Is dat hier inn Sand fullen? Ik bün nu vull Unroh un suer. "Krieg di wedder in!" seggt mien Lüüd. Un dat do ik denn ok un drink denn glieks mal Beer Nummer twee. Man de Fraag blifft doch: wo is dat Portemonai?
Gröten vunn Strand vun Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen