zur Navigation springen
So spricht Schleswig-Holstein

12. Dezember 2017 | 10:04 Uhr

100 Sekunden Platt : Wannern int Land

vom

Den höchsten Berg im Lande zu besteigen, das macht Spaß! Darum auf zum Bungsberg, rät Marianne Ehlers.

shz.de von
erstellt am 28.Jun.2013 | 12:25 Uhr

Nee, Bargen hebbt wi hier nich in Sleswig-Holsteen - un wannern kannst denn ok nich so richtig in de Hööchd.
Man, Ogenblick mal, so ganz stimmt dat ok nich! Wi hebbt den Bungsbarg vergeten - de is dat Hööchst, wat wie hebbt int Land - mit 167 Meter. Dat is doch al mal wat!
Un baven steiht en Feernmelltoorn, dor kann een ropstiegen un vun de Galerie ut ganz wiet kieken - vun Laboe bit röver na de däänschen Inseln, dat lohnt sik.

So maakt wi uns denn mal op den Weg - en Wannertour vun veer Stünnen liggt vör uns. Dat seggt uns lütt Book, de Wannerföhrer för de sleswig-holsteensche Oostseeküst. De verraadt uns ok, dat wi en Stück vun den Europääschen Feernwannerweg lopen warrt. Na denn!
Bi t Naturhuus "Eule" bi Kasseedörp geiht dat los. Wi kaamt glieks vörbi an en Naturschutz-Rebeet mit Dieken - un dorna sünd wi ok al bald merrn in den Woold un kaamt na dat Dörp Schönwalde. Ünnerwegens gifft dat Steden ton Vagel-Bekieken oder eenfach blots ton Verpusten.
As wi op den Bungsbarg ankaamt, sünd wi en beten mööd, man wi markt glieks: uns Book hett nich toveel verspraken. Wi stiegt op den Toorn: ja, dat is de Kiek weert! De Sünn schient - un wi köönt wiet över de Oostsee kieken. Op Tafeln warrt uns nipp un nau verkloort, wat wi jüst sehn köönt. Dat is allerbest un gefallt uns goot. Mang de hogen Bööm köönt wi sogor den olen Elisabeth-Toorn vun 1864 klook kriegen. De is do as Utsichts-Toorn boot worrn, man nu kann een dor nich mehr rop.
Nu is eerstmal Tiet ton Eten un Drinken. Lang sitt wi un freut uns, dat wi so hooch baven sünd - na ja, hooch ... Is doch allens en Fraag vun de Perspektiv. Wi Noorddüütschen hebbt jedenfalls 167 Meter schafft.
Tofreden maakt wi uns op den Weg torüch, vörbi an de Schwentine - un nu weet wi: een kann wunnerbor wannern in uns Land!
Gröten vunn Barg seggt Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen