100 Sekunden Platt : Vagels bang maken

Wie heißt eigentlich eine "Vogelscheuche" auf Plattdeutsch? Marianne Ehlers hat allerhand Begriffe gefunden. Kennen Sie noch weitere?

Avatar_shz von
07. Oktober 2011, 12:07 Uhr

Buten regent dat nich - denn man to, laat uns spazeren gahn.
Wi maakt uns op den Weg, draapt Lüüd, snackt en Stoot, kiekt uns de Goorns un Feller an. "Kiek mal, dor achtern, dat is doch en..." Ja, wat denn? Nu fallt uns doch partout dat plattdüütsche Woort för düssen Keerl dor nich in! Dat gifft dat nich!
Dor steiht he, merrn int Land, Kopp un Buuk ut Stroh, en bunten Hoot opsett, en ole Jack ant Liev. Schall gegen de Vagels hölpen, dat de nich allens opfreten doot. De ... ja, Vogelscheuche op hoochdüütsch, man wi Frünnen sünd nu mal jüst ant Plattsnacken un sünd verbaast, dat wi keen Naam fö em hebbt.
"Ik kiek na!" seggt de een. Un ann annern Dag hett he dat rutfunnen, gifft ja kloke Wöörböker för sowat.

Dat Wöörbook för Sleswig-Holsteen vun Mensing seggt "Strohkeerl" oder "Strohpopp", sogor "Vagelbangmaker" - un toletzt ok noch "Schuchel" - na, so ganz tofreden sünd wi nich. Kiekt wi doch noch mal in dat "Hamburgische Wöörbook". Dor heet dat "Vagelschüüch" oder "Vagelscheuch" för Hamborg, int Ole Land seggt se "Spreenkeerl" - de Spreen sünd de "Stare", in Harburg "Strokeerl" oder "Stropopp" ahn dat "h". Intressant is de Utdruck vun Finkenwarder: "Lünentweern", wobi "Lünen" de Spatzen meent un "Tweern" is de Antog.
Un, wat för en Woort nehmt wi nu? Wi köönt uns nich entscheden. Villicht hebbt uns Lesers un Hörers noch en Idee? Wat seggt de Sleswig-Holsteeners to "Vogelscheuche"? Ik bün gespannt! Schrievt Se uns, wenn Se en Idee hebbt. Dat geiht in de Kommentoor-Funktschoon.
Schuchelig Gröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen