100 Sekunden Platt : Ut mien Bökerschapp

Bunt wie das Leben, von allem etwas, die ganze Bandbreite der plattdeutschen Literatur findet sich bei Marianne Ehlers im Regal.

shz.de von
17. April 2013, 11:46 Uhr

Ach, egentlich kunn ik mi mal en beten na buten setten un lesen. Jüst heff ik en beten Tiet - un keen Book in de Gang. Dor gah ik doch mal hen na mien grote plattdüütsche Bökerschapp un freu mi mal wedder, dat ik dat so fein sorteert heff. Vun A bit Z, dat ganze Alphabet akkraat dörch, na de Schrieverslüüd, versteiht sik. Oswald Andrae un Reimer Bull kaamt vör Hinrich Kruse, Hans Hansen Palmus kümmt vör Gerd Lüpke, Irmgard Harder vör Bernhard Trittelwitz. Un so geiht dat wieder, mien Alphabet is perfekt, finn ik.

Ik nehm mi en Stapel mit na buten, sett mi in de Sünn - un söök feine niege Geschichten för mien nächsten Leesavend rut. Dorbi sünd de olen Stücken för mi mitünner nieg dorbi - gifft ümmer wedder wat ruttofinnen.

Ik lees vun fröher un vun vundaag, vun em un ehr, vun Arbeit un Tohuus, vun Borenwarrn un Starven, dat ganze Leven finn ik in mien plattdüütschen Böker afbillt.

Man ann mehrsten intresseert mi denn doch, wenn dor wat schreven warrt, wo ik glieks mark: dat hett nich düssen Stempel vun "is allens sülfst beleevt". Düssen Stempel mag ik nich so geern. Ik will veel lever wat lesen, wat so richtig fein utdacht is - man wo ik mark, dat harr so angahn kunnt, mutt aver nich.

Ik mag dat, wenn ok de plattdüütsche Schriever de Fantasie lopen lett, wenn he sik losmaakt vun dat, wat al ümmer so weer. Wenn he Biller finnt, de mi mitnehmt un mi sülven menen köönt, un wo ik nich glieks op de eerste Siet al Bescheed weet, wo de Geschicht henlopen warrt. Dat is dat, wat Literatur för mi utmaken deit - int Hoochdüütsche un ok int Plattdüütsche.

Sowat finn ik denn ok vundaag, buten in mien Goornstohl, mit en Tass Kaffee dorbi - un bün wedder mal froh, dat mien plattdüütsche Bökerschapp so veel hergeven deit.

Gröten vun achtern mang de Regalen seggt Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen