100 Sekunden Platt : Ünnerwegens mit Cabrio

Das ist wirklich ein besonderes Erlebnis - oder doch nicht? Marianne Ehlers erzählt von dieser Fahrt.

Avatar_shz von
12. Juni 2013, 03:24 Uhr

Wat seggst du, du hest dat licht mal mit de Ohren? Du kannst keen Tog af, denn hest du glieks Ohrenpien? De Drüppen hest du ümmer in dien Medizinschapp stahn? Un dree-/veermal int Johr bruukst du ehr ok?
Na, denn büst du nich de richtige Minsch för en Cabrio! De mutt nämlich fit ween, dörv sik nix ut Wind un slechte Weder maken, sünst is he nich cool un kann dat vergeten mit en Cabrio.
En Cabrio is ja düer, kriggst nich mal so even för en poor lütte Dusender. Dor musst du al düchtig wat op den Disch leggen. Mutt ja ok, dat Dings schall ja wat hergeven. Is ja nich blots ton Autoföhren, nee, ok so en beten ton - ja, ik segg dat, as dat is: ton Angeven, ton op den Putz hauen, Indruck schinnen bi anner Lüüd ... un so wieder. Düsse "anner Lüüd" sünd meisttiets junge Froons, is ja nix, wat achtern Barg blieven mutt.

Nu wöllt wie em mal beluern, uns Naver mit sien Cabrio. Kiek doch mal! Nu stiggt he in, denn stiggt he wedder ut un löppt eenmal um sien veer Rööd. Un denn maakt he dat Verdeck los - kloor, dat mutt nu! Sünst hett dat keen Schick, en Tour to maken. Is en frischen Wind vundaag, man dat maakt em nix, he is ja keen en Weekei .
Nu tüdelt he sik en ganz smucken Schaal för Mannslüüd um - un kickt dorbi eenmal de Straat langs. Luert he na en Deern ut?
Nu stiggt he in, maakt allens op Schick in dat Cockpit, sett sik en dicke Sünnenbrill op de Nees. He bringt sik in Positur - un denn huult ok al de Motor luut op. Kiek doch mal, wo gau he afbruust un in en Wulk vun Stoff verswinnen deit - he mit sien Cabrio. Wo he woll op daal will? Dat müch ik doch to geern mal weten.
Oh, nu kümmt he de Straat wedder torüch. Aha, he hett en Deern afhaalt - ach nee, wat heff ik seggt?
Kennst du ehr? Nee? Laat mi mal nipp tokieken.
Kiek mal, he winkt. He meent uns! Ik dreih af, de Deern kenn ik! Dat kann ik nich glöven...
Du, ik gah dal un hau em sien Cabrio inn Dutt. Dat laat ik nich mit mi maken, sowat!
Fuchtig Gröten seggt Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen