100 Sekunden Platt : To Pingsten ach wie schöön

Marianne Ehlers denkt über dieses alte Gedicht des Hamburger Coupletsängers Hein Köllisch nach und wünscht ein regenfreies Pfingsten.

shz.de von
17. April 2013, 11:44 Uhr

Weetst du noch, dat ole Leed vun de Pingsttour? Wat, dat kennst du nich ? Kann ja woll nich angahn! Ik heff ümmer dacht, dat is överall bekannt.

Dor mööt wi doch nödig mal in uns plattdüütschen Böker söken. Un süh, dor is dat Stück ok al - schreven hett dat Hein Köllisch ut Hamborg. Dat Gedicht kann een wunnerboor singen na de Melodie vun "Die Musik kommt."

Un nu geiht dat los, höör man mal nipp to:

To Pingsten, ach wie schöön -

wenn de Natur so gröön

un allens na buten geiht -

dat is ne wohre Freud,

besünners för de Görn -

de höört man räsonern:

Weer Pingsten doch eerst blots -

denn gaht wi los!

Denn warrt de Kinner wuschen - un an den annern Morgen geiht dat rechttiedig los. Dat schall ja en schönen Dag warrn mit Eten un Drinken dorbi.

Un nu wieder int Stück:

De Vadder geiht vöran -

en witte Maibüx an,

sien Jung kümmt in de Mitt -

natürlich ok in Witt.

Dorbi hebbt s op den Kopp -

en fienn Strohhoot op,

allns sauber un mit Schick -

graad as gelickt.

Un nu kümmt achterher -

mit t allerlüttste Göör

inn groot Kinnerwagen

de Mudder angeschaven.

De Dochter maakt den Sluss -

stolt un mit Hoochgenuss,

inn Arm mit ehren Freier -

en Piependreiher.

Un so geiht dat Stück wieder, wi köönt uns dat vörstellen, wat passeert: merrn in dat beste Amüsement gifft dat düchtig Regen, jüst nich dat Best för de witte Maibüx - man ant Enn heet dat denn doch:

So warrt in Hamborg Pingsten fiert

un sik fein amüseert.

So seggt Hein Köllisch - un düt

Leed is in de wiede Welt gahn domals - un is ok in anner Spraken bekannt worrn.

Fröhliche Pingstdaag ahn Regen wünscht Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen