zur Navigation springen
So spricht Schleswig-Holstein

14. Dezember 2017 | 15:01 Uhr

100 Sekunden Platt : Sülven maken

vom

Marianne Ehlers freut sich über den derzeitigen Kreativ-Trend. Selbstgemachtes ist hoch im Kurs, besonders bei jungen Leuten.

shz.de von
erstellt am 10.Mai.2013 | 07:09 Uhr

Inn Winter heff ik mi wunnert: soveel bunte, sülven strichte Mützen harr ik de Johren vörher nienich sehn! In de Bahn, bin Dokter, överall seten junge Lüüd, Mannslüüd un Fruunslüüd bi to strichen. Bunt un smuck weer dat, wat dorbi rutkeem.

Nu hebbt wi Mai, un velen loopt ümmer noch mit Mützen rum, man dünner, mit Luftlöcker in oder mit wiede Maschen, is fein antosehn.

Sülven wat maken is groot in de Mood - nich blots wat ut Wull, nee, ok ut bunte Stoffen. Junge Lüüd neiht sik ehr Kleedaasch nu sülven un sünd dorbi kreativ as man wat. Un se gaht flink mit de Neihmaschien üm.

Neihmaschinen-Ladens hebbt jüst en goden Umsatz - un Neihkursen staht ganz baven op de List vun dat, wat in de Freetiet so beschickt warrt. Is dat nich wunnerboor?

Snittmusters gifft dat int Internet ton Daalladen, un nich blots dat. Dor warrt sik in Blogs uttuuscht, een kriggt Tipps un ok Hölp, wenn mal wat verkehrt lopen is. Mi gefallt dat, düsse velen Ideen för Kleedaasch un Taschen un dat ganze Rundümbi, wat de Mood so utmaken deit.

Man annerletz heff ik mi wunnert: Omas ole Snittmusters ton Utradeln, de warrt nu nödig bruukt. Eenmal so neihen as Grootmudder in de 50er Johren, dat is doch fein. Un denn fallt mi dat wedder in: ik stah bi Mudder in de Stuuv. Se is dorbi, mi en Kleed to neihen, ik schall anpassen. So hebbt wi ümmer seggt. Se stickt den Soom af, ik mutt still stahn, mi is swiemelig. Un egentlich will ik lever wedder na buten.

Un noch en anner Bild kümmt mi vör Ogen: de Handarbeits-ünnerricht in de School. Wi sitt an richtig ole Neihmaschins, ahn Strom, noch ton Pedden. Ik krieg dat allens nich hen, de Naht warrt ümmer scheef. Ik kann dat eenfach nich sehn, mien Ogen weren al domals slecht. Un de Lehrerin schimpt as dull mit mi.

Un dorüm freu ik mi, wenn all de jungen Lüüd Freud hebbt an dat Sülvenmaken. Bi mi is de Freud domals hangen bleven, in de School, an de ole Neihmaschin.

Un bi de neee Sülven-Maak-Well warrt ok de Omas noch bruukt: As Häkel- un Strichomas: Dor sünd twee Jungs, de Mützen häkelt. De Nafraag is so groot, dat se Hölp bruukt un nu övernehmt vele Omas dat Häkeln. Vun düsse Projekten gifft dat al en Barg. Ik kann mi vörstellen, dat ok mien Oma dat gefullen harr...

Kreativ-Gröten seggt Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen