100 Sekunden Platt : Sommertiet in Noorden

Auch im Sommer ist unser Land einfach schön und lädt zu vielen Veranstaltungen ein, das meint Marianne Ehlers.

Avatar_shz von
23. Juni 2012, 10:08 Uhr

Nu sünd wi merrn inn Sommer inn Sleswig-Holsteen. Güstern weer de letzte Schooldag int Land - un nu kann dat losgahn mit Urlaub un frie Tiet, mit Baden un Vergnögen. Wat seggst du, du hest noch keen Urlaub? Na, maakt nix, liekers kannst du avends mal ant Water föhren un en Stück an de Kant lopen. Musst ja nich glieks rinspringen.
Un wenn du Urlaub hest, denn föhrst du weg? Flüggst sogor op de Malediven? Na denn man to, ik günn di dat, dat warrt seker en schöne Tiet för di. Man denk doran, wat du allens verpassen deist, wenn du inn Sommer nich int Land büst. All de Veranstaltens un Konzerte ton Bispill. Dat Sleswig-Holsteen-Musikfestival mit ganz veel chineessche Musik lohnt sik ganz seker. Un denn dat Grillfest vun de Füerwehr, dat Sommerfest vun den Kleengoornvereen un sünst noch wat.
Hest du di denn de "apen Goorns" ankeken? Ja, na sühst du, denn hest du seker wat beleevt un en ganze Barg mitnahmen för dien egen Goorn. Verleden Sünnavend un Sünndag weer dat, dor kunn een överall inn Noorden private Goorns ankieken. Düsse Aktschoon gifft dat al siet en poor Johren - un dat maakt so richtig Spaaß to kieken, woans anner Lüüd ehren Goorn op de Reeg hebbt.
In Sleswig-Holsteen kannst goot över den Sommer kamen - un wenn du blots in dien egen Rebeet bliffst, geiht dat ok. De Navers sett sik geern mit op dien Terrass un drinkt en Beer oder en Glas Wien mit di, dor kannst op af!
Beste Sommergröten vun
Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen