100 Sekunden Platt : Sommerglück

Unter Sommerglück versteht sicher jeder etwas anderes. Der plattdeutsche Dichter Johann Hinrich Fehrs findet es draußen in der Natur. Marianne Ehlers rezitiert sein Gedicht.

Avatar_shz von
25. Juli 2013, 06:24 Uhr

Wat is dat - Glück inn Sommer? För uns vundaag villicht de Roh inn Urlaub, dat Verpusten vun de kole Tiet, de Sünn geneten, en Tass Kaffee buten inn Goorn? För den plattdüütschen Dichtersmann Johann Hinrich Fehrs weer dat de Natur, de em soveel Glück to beden harr. Un dorüm höört sik sien Sommerglück so an:

So frisch un still! Ganz liesen geiht
De Wind dör Woold un Wisch un Feld,
De Morgensteern in t Oosten steiht
Un to sien Föten slöppt de Welt.
An Kruut un Grasspier, Blatt un Bloom
Hangt Parlen, blank as Edelsteen,
Se hebbt woll all en schönen Droom
Un mööt in Slaap vor Freuden ween.
Dor stiggt de Lerch in t Morgenroot,
Un Busch un Boom de schütt sik mal,
De Wildroos süht mit Ogen groot
Vun n hogen Doornknick op mi daal.
De wunnert sik, dat ik al waak.
Lütt Bloom, mi drifft keen Sorg un Sünn,
Ik gah alleen dör Dau un Daak,
Wiel ik doch gor to glücklich bün.
Mien Hart is as de Heven kloor,
Na Storm un Larm so still un fraam.
De Nacht vergung, de Dag is dor,
Mien Kinnerglück is wedderkaam.
Noch güstern mööd un matt un möör,
So trurig ach weer mi tomoot,
Op eenmal stunn dat Glück vor Döör
Un seh mi an mit Ogen groot.
Wo bleev de Graam? Ganz liesen quellt
De helle Freud op jedes Flach -
Blöh, blöh, lütt Bloom! Du schöne Welt,
Buten un binn is Sommerdag!
Laatsommergröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen