100 Sekunden Platt : Sommer vun achtern

Ein schönes Gedicht von Ernst Otto Schlöpke - Marianne Ehlers blickt damit dem Sommer hinterher.

shz.de von
23. September 2011, 04:52 Uhr

Wo is he afbleven, düsse Sommer, de sien Naam nich verdeent hett - is he utneiht, gor nich dor ween? Doch tööv, ik heff em sehn: man blots vun achtern. He weer al meist weg, man so en lütte Stück kreeg ik noch tofaten.
Veel beter doröver dichten kann Ernst Otto Schlöpke, de bekannte plattdüütsche Schrieversmann ut Niestadt an de Oostsee. De letzten Levensjohren hett he in Bremen wahnt, man "sien" Sleswig-Holsteen is em bit toletzt wichtig ween. He storv inn Juni vun düt Johr int hoge Öller vun 90 Johr.
"De Welt steiht kopp" heet een vun sien Böker - un nu weet wi dat: ok fröher hett dat ok mal den een oder annern Sommer geven, de nix döggt hett.

Man nu "EOS", as Frünnen em nöömt hebbt, mit dat Gedicht

September
Ik heff hüüt den Sommer vun achtern sehn.
He dreih den Kopp, plink mi to
un streck sik un möök noch mal so
verschaamt op lustig: swunk mit de Been,
as speel he en jungshaftig Footballspeel!
Mit wat?
Mit n Blatt!
Mit hupenwies Bläder. Un de weren geel.
Un bruun. Un griesfarben oolt weer dat Gröön -
dat Gröön in sien Ogen, as he
- noch eenmal - mi toplinken dä.
Ik heff hüüt den Sommer vun achtern sehn.
Grööngeelbunte Gröten vun Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen