100 Sekunden Platt : Septembertiet

Der Herbst bricht an - die Äpfel werden geerntet. Über eine besondere Sorte aus Schleswig-Holstein berichtet Marianne Ehlers auf Plattdeutsch: Stina Lohmann.

shz.de von
16. September 2011, 10:01 Uhr

September weer t, du schienst mit rode Bern - Ik weer so selig as en Kind inn Droom.
So heet dat in dat Gedicht "Alleen" vun Johann Hinrich Fehrs, un dat lett, he is geern alleen mit sik un de Welt, freut sik över de bunten Klören vun den Harvst.
Wenn wi nu al nich so en dullen Sommer harrn, villicht gifft dat nu doch noch schöne Daag, de wi geneten köönt. Buten inn Goorn, mit den Hund in de Natur, mit Fohrrad op Tour to’n Brummelberen plücken - un ok de Appelbööm laadt uns in, de sworen Twiegen nich so hangen to laten.
Gifft en Barg Appeln in uns Land, nee, ik meen nich de ut den Supermarkt, de all egalweg smecken doot. Ik meen Holsteener Cox un Ruhm von Kirchwerder, Roden Boskopp un Stina Lohmann.

Stina Lohmann, dat is nu en heel besünnern Appel. De Pomologen dat sünd Minschen, de över Appeln Bescheed weet, seggt, dat düsse Sort een vun de besten noorddüütschen Lagerappeln is. To finnen ist he op de Geest in dat middelste Holsteen , mitünner ok bit hen na West-Meckelnbörg.
Wo de Appel sien Naam herkregen hett? Dorto gifft dat en schöne Geschicht: Fru Stina Lohmann leev üm dat Johr 1800 in Middelholsteen. In ehren Goorn stünn en Appelboom, den harr se sik sülven ut en Appelkeern trocken. Wenn nu bi all ehr Navers de letzten Appeln fuul weren, denn haal Stina ehr egen Appeln frisch un knackig ut dat Lager un verdeel se an Kinner un arme Lüüd. As se 1860 sturv, kreeg de Appelsort ehren Naam.
Kann een selig ween, wenn een so en Appelboom in’n Goorn stahn hett. Un blifft nich alleen dormit, man dat hett de Dichtersmann Fehrs seker nich meent.
Vörharvstgröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen