100 Sekunden Platt : Schimpen op Platt

Stimmt es eigentlich, dass sich das Schimpfen auf Platt gar nicht so schlimm anhört? Marianne Ehlers hat da so ihre Zweifel.

shz.de von
15. Februar 2013, 04:34 Uhr

Op Plattdüütsch höört sik allens veel netter an, dor kannst du allens seggen un keen Minsch nimmt di dat övel. Du kannst schimpen, so dull as du man kannst, is doch allens nich slimm. Lacht de Anner doch blots över.
Na, ik weet nich. Wenn ik düsse Sätz hören do, denn warr ik ganz füünsch. Dat stimmt eenfach nich, du kannst ok op Platt en Minschen dull een övern Latz hauen, verbal, meen ik. Un denn is dat jüst so slimm as in jeed anner Spraak ok.
Kiek mal mit mi in dat Schimp-Wöörbook för Sleswig-Holsteen rin, ja, sowat gifft dat.
"Ik dösch di to Brie un Appelmoos, du verdreihte Briet!"
Oder:
"Gah nan Maand un brenn Kaffeebohnen, du Fischkopp!"
Un noch leeger:
"Dat Fruunsminsch mag ik nich mit de Füertang anfaten!"
Oder ok:
"Legg di op n Rüch un laat di vun de Sünn int Muul schienen, du Hungerslund, denn hest wat Warmes int Liev!"
Nich nett is ok:
"De Piesepampel schall sik man wohren, he hett bi mi noch wat in Suer."
Un:
"Vunt Lege so wenig as möglich, see de Piepenschieter, do heiraadt he en lütte Fru."
So richtig beleidigen kann een de Anner mit düssen Snack:
"Du Suppenswien büst dat weert, op n Piepenkopp maalt to warrn."

Un so geiht dat munter wieder: vun Ammerkacker bet Zitterkatusch, vun Fiesbüdel bet Swabbelmoors, vun Griesmuul bet Schnarchlappen, vun Knakenschooster bet Puttschraper.
Un dat schall allens nett ween? Ik meen nich. Nu fraag ik de Hörers un Lesers: hebbt jem en nette Schimpwoort för mi? Denn vertell mi dat - ik bün gespannt!
Gröten ahn Schimpen vun
Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen