100 Sekunden Platt : Platt vördrägen

Heute geht es in Rendsburg um das richtige und effektive Vortragen plattdeutscher Texte. Marianne Ehlers ist dabei.

shz.de von
27. Januar 2012, 07:41 Uhr

Wat mutt een nich allens lehren un kloor kriegen int Leven! Büst du en plattdüütschen Schriever, denn kannst villicht schrieven - man kannst du dien Geschichten ok vördrägen, dat de Lüüd dat gefallt? Oder büst du so een, de sik hensett, afleest, nich hoochkieken deit, mitünner stamert un denn verlichtert is, wenn de Text ant Enn is?
So een möögt de Lüüd nich geern tohören. Un so is dat denn klook, sik mal wat aftokieken bi annern. Wo maak ik dat, dat mien Tohörers sik för mien Geschichten intresseert? Mit wat krieg ik ehr tofaten? Wann kiek ik in den Saal? Wat hett de Stimm för en Bedüden?

Op all düsse Fragen gifft dat en Anter, ok wedder bi en Seminoor vun den Sleswig-Holsteenschen Heimatbund. Jüst vundaag öövt se dor all, de Vörlesers un Vördrägers, wedder int Martinshuus in Rendsborg - un Hölp gifft dat vun den beiden Fachlüüd Thorsten Börnsen un Hartmut Cyriacks. De köönt opt Allerbest bipulen, woans de Deelnehmers mit en Text ümgahn schullen.
Mag ween, dor warrt vundaag ok över dat Vördrägen vun en Gedicht snackt. Un denn höört sik dat so an:
Mien Anna is en Ros so root
Mien Anna is en Ros so root,
Mien Anna is mien Bloom,
Mien Anna is en Swölk to Foot,
Mien Anna is as Melk un Bloot,
As Appeln opn Boom.
De Vullmacht hett en Appelgoorn
Un Rosen ine Straat;
De Vullmacht kann sien Rosen wohrn,
De Vullmacht kann sien Appeln oorn:
Mien Anna is mien Staat!
Se is mien Staat, se is mien Freid
Un allens alltomal,
Un wenn de Wind de Rosen weiht
Un wenn de Wind de Appeln sleit:
Se fallt mi nich hendaal.
Se fallt ni af, se fallt ni hin,
Se hett so’n frischen Moot:
So blöht mien Hart, so blöht mien Sinn,
Mien Anna blifft de Bloom dorin
Bet an mien selig Dood.
Dat weer Klaus Groth. Beste Gröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen