zur Navigation springen

100 Sekunden Platt : Opt Rad över de Halfinsel

vom

Was gibt es schöneres, als eine Radtour im sommerlichen Norden? Marianne Ehlers schwärmt von einer Tour über die Halbinsel Eiderstedt.

Laat uns doch mal en Radtour maken - wi hebbt doch Urlaub! Na, denn man to. Wi entscheed uns, mal ton Kaffeedrinken na dat ole Slott Hoyerswort bi Oldenswort to föhren.
Meddags Klock een geiht dat los, de Sünn brennt vunn Heven. En poor schöne Sommerdaag hebbt wi ja doch, is nich allens so slecht, as wi dat int Geföhl hebbt.
Sünnencreme hebbt wi uns düt Johr gor nich eerst köfft. Lohnt sik ja doch nich. Bi uns Mudder inn Spegelschapp in de Baadstuuv finnt wi noch en grote orange Buddel. Blots as wi mal nakieken doot, markt wi, dat düsse Sünnenmelk al den 12. Geburtsdag fiert hett - dor in dat düster Schapp.

Laat man, denn lever en beten root warrn. Un so kümmt dat denn ok. Wi föhrt dör de Meddagssünn un hebbt en richtig roden Kopp, as wi op Hoyerswort ankaamt. Goot, dat wi denn eerstmal ringahn köönt un uns dat Museum mit de Geschicht vun de Familie Hoyer un vun dat Huus ankieken köönt. Un de Geschicht vun den Blootplack - man de vertell ik en anner Mal.
Ünner den groten Sünnenscherm inn Kaffeegoorn laat wi uns Kaffee un Koken smecken - wat is dat doch för en feinen Urlaubsdag. Torüch föhrt wi över Tönn - immer an den Diek langs. Op eenmal sünd wi denn bi Fründ Wilhelm in de Schankwertschop lannt. He is bekannt för sien leckern Eiergrog. Wi mööt ja noch mal opt Rad, un dorüm drinkt wi lever en Cappucino.
Gröten vun de Halfinsel vun Marianne Ehlers vun den Sleswig-Holsteenschen Heimatbund.

zur Startseite

von
erstellt am 10.Aug.2012 | 03:54 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen