100 Sekunden Platt : Oolt warrn, wo schall dat gahn?

Was will ich im Alter noch machen, was kann ich dann noch? Fragen, die jeden bewegen, meint Marianne Ehlers.

Avatar_shz von
26. April 2013, 05:49 Uhr

Rechttiedig schull sik de MInsch en Kopp doröver maken: wat hett he noch vör int Öller, wat kümmt in de Rententiet, wat is em denn noch wichtig? Dat sünd Fragen, de een sik al to rechter Tiet stellen schull. Man deit een dat?

Mehrsstiets is de Dag vull mit Arbeiden, Familie, Frünnen, Hobbys, Urlaub. Wo blifft dor de Tiet för dat Nadenken över dat, wat doch noch so lang hen is?

Een schüfft un schüfft all düsse Fragen vör sik her - un weet nich, wat dat Öller för een sülven bedüden kann. Krankheit? Nee, will ik nich! Alleenween? Will ik ok nich! Arm ween? Eerst recht nich - un ok nich op anner Lüüd anwiest ween. Ja, wat denn?

Egentlich will ik doch, dat allens dat blifft, wat schöön is un wat mi gefallt. Mehr Tiet will ik hebben, ik bün denn ja nich mehr int Arbeitsleven. Un so fit as nu blieven. Kunn dat allens klappen? Seker so nich - ik mutt eenfach dormit reken, dat de Knööv nalaten deit, un dat ik nich mehr soveel Geld ton Utgeven hebben warr.

Oha, nu bün ik doch en beten nadenkern worrn. Goot, ik maak mi en Kopp üm dat Thema - man nich jeedeen Dag! Ik bün doch in dat Hier un Nu, dat dörv ik doch ok nich vergeten. Nu will ik leven, nu mien Spaaß hebben, nu en beten Glück finnen.

Ja, wat denn nu, leve Lüüd? Is seker allens en Fraag vun de Perspektiv - wonehm stah ik jüst sülven? Denn maak ik dat doch mal so: ik kiek na achtern un nehm dat mit, wat goot weer, maak vundaag wat dorvun un freu mi op de Tokunft! Un allens Anner warrt sik finnen, oder nich?

Nadenkern Gröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen