zur Navigation springen
So spricht Schleswig-Holstein

19. November 2017 | 09:51 Uhr

100 Sekunden Platt : Över de Kant kieken

vom

So viele verschiedene Sprachen und Dialekte - und doch versteht man sich. Das hat Marianne Ehlers auf einem Mundart-Kongress erlebt.

shz.de von
erstellt am 19.Apr.2013 | 05:54 Uhr

Dat is ja nich verkehrt, mal op Reisen to gahn. Lehrst wat dorto, sühst wat anners un snackst mal mit anner Minschen. Un höörst mal anner Spraken, nich ümmer blots plattdüütsch un hoochdüütsch.

Annerletz weer ik inn Süden un heff bi en Mundoort-Drapen soveel verscheden Dialekten höört, dor weer dat Enn vun weg. Neeg bi Basel weer dat, un dor gifft dat Alemannsch in verscheden Formen.

To Besöök weren ok de Franken un de Swaben, de Bayern un de Bodensee-Alemannen. De Lüüd kemen vun Vorarlberg un Tirol, ut dat Soorland un vunt Elsaß, düsse Moselfranken.

Dat weer en Dörcheenanner vun verscheden Töön un Utdrücken, jüst för mien noorddüütsches Ohr mitünner nich eenfach. Man laat man, de vunn Süden hebbt dat ok nich licht, mien plattdüütschen Tungenslag int Ohr to nehmen.

So hebbt wi opeenanner höört un vuneeenanner lehrt - un dor weer ganz veel Verstahn twüschen de Minschen achter de Spraken. Un dat is doch dat, wat uns so männichmal fehlt - dat Klookwarrn ut den Annern, dat Ingahn op den sien Ideen un Gedanken. In uns Alldag geiht uns dat mitünner so dull över de Kant - richtig slimm un schaad is dat.

Dor kann dat hölpen, mal wiet weg mit Lüüd Kuntakt to hebben, för de Spraak wat heel Wichtiges un Notwenniges is. Un denn to marken, dat all de verscheden Kulören vun Dialekten un Spraken dat Leven bunt un besünners maken köönt.

Un op eenmal, dat is doch gediegen, kann ik villicht veel beter verstahn, wat mien Naver, mien Kolleg, wat Minschen, de mi neeg sünd, meent un denkt. Wenn ik wedder tohuus bün, seh ik allens en beten anners an as vörher.

Un dorüm, jüst dorüm, is dat wiss nich verkehrt, mal op Reisen to gahn.

Gröten vun wiet weg seggt Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen