100 Sekunden Platt : Över de Kant kieken

Auch in Niedersachsen läuft eine ganze Menge an Aktivitäten für die plattdeutsche Sprache. Marianne Ehlers ist in Lüneburg dabei.

shz.de von
19. Oktober 2012, 12:11 Uhr

Plattdüütsch is en noorddüütsche Angelegenheit un geiht nich blots uns Sleswig-Holsteener wat an. So loht sik dat, mal över de Kant to kieken. Is gor nich wiet: eenmal dörch den Elvtunnel, will hapen ahn Stau un lang töven, denn noch en lütt Stück wieder - un du büst in de ole Soltstadt Lümborg.
Günter Wagener, de Plattdüütsch-Beopdragte för Lümborg un ümto, hett en Kurs för Platt in School un Kinnergoorn in de Gang bröcht. In Tosamenarbeit mit de Volkshoochschool köönt Schoolmeisters un Mitarbeiders ut Kinnergoorns sik wiederbillen. Dat geiht dorüm, Platt an de Lütten rantobringen - un dorto gifft dat ganz veel mit op den Weg. Grammatik un Spraakgeschicht, en lütten Theorie-Ünnerbuu, man wat noch mehr hölpen deit, is dat Handwarkstüüch för de Praxis. Dor warrt denn Material an de Hand geven: wat kann een spelen un singen mit de Lütten, op wat för en Aart un Wies köönt de Groten ehr de Spraak bipulen?

Emma, de Mööv, de blots Platt kann, is dorbi. Jüst so Hein, de Sprakenpopp, de keen hoochdüütsch Woort versteiht - de beiden hölpt mit, de Spraak an de Lütten rantobringen. Un se freut sik, dat se ok mal en Utflug na Neddersassen maken köönt. In Sleswig-Holsteen sünd se tohuus un as Sprakenhölpers bekannt. Annerletzt weren de beiden in Eckernför - un inn November sünd se bi dat Plattdüütsch-Zentrum in Leck. Ja, de sünd düchtig dorbi - un Spaaß maakt dat ok noch! Dat meent de Deelnehmers vun den Kurs.

Gröten - dütmal ut Lümborg vun
Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen