100 Sekunden Platt : Öllern

Der plattdeutsche Erzähl-Wettbewerb "Vertell doch mal" verlangt in diesem Jahr Geschichten über Eltern. Marianne Ehlers ermuntert zum Schreiben.

shz.de von
20. Januar 2012, 05:45 Uhr

Nu is dat rut, dat niege Thema för den plattdüütschen Schriev-Wettstriet "Vertell doch mal", den de NDR un dat Ohnsorg-Theater as jedes Johr ok 2012 wedder op de Been stellt. Verleden Johr schullen Geschichten to dat Thema "Kinner" inschickt warrn - un düt Johr? Richtig, dütmal geiht dat üm "Öllern". Dat is nu doch mal en dankboor Thema! Denn dorto kann doch jedereen wat vertellen, Öllern hebbt oder harrn wi all - un beleevt hebbt wi veel mit uns Öllern.

Öllern sünd dor för uns Kinner, Öllern hölpt mit, dat wi all groot un düchtig warrt - Öllern verlangt veel, weet veel, sünd ümmer klöker as de Kinner. Öllern hebbt allens dat beleevt, wat Kinner nich unbedingt ok beleven schullen - na ehr Menen.
Öllern kann een leev hebben oder ok nich, kümmt op an, wat een so beleevt hett fröher, vundaag - un wat een nich beleven wull, aver liekers hett.
Öllern sünd en Stück vun uns Leven, en heel wichtigen Deel - un dorüm kann ik mi vörstellen, dat de NDR düt Johr wedder mit en poor dusend Geschichten reken mutt. Un dor mööt denn den besten rutsöcht warrn - dat is ja nu nich so eenfach!
Ant Enn blievt 25 Geschichten över, de kaamt in en lütt Book, wat, na kloor, denn ok "Öllern" heet. Un vun düsse 25 Schrieverslüüd söcht sik de Jury denn de 5 Besten rut. De 5 Geschichten warrt denn bi de grote Matinée int Ohnsorg-Theater in Hamborg leest. Man dat vertell ik denn en anner Mal. Nu schall dat eerstmal losgahn mit dat Thema "Öllern". Wokeen mehr weten will, kann sik klook maken int Nett oder ok direkt bi den Noorddütschen Rundfunk in de enkelten noorddütschen Bundslänner, wi hier baven fraagt an’n Besten in Kiel na.
Veel Pläseer bit Geschichten schrieven wünscht Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen