100 Sekunden Platt : Musik överall

Das Schleswig-Holsteinische Musikfestival bestimmt die Kulturszene im Lande. Marianne Ehlers ist dabei.

shz.de von
27. Juli 2012, 12:37 Uhr

Nich ganz överall - man bi uns in Sleswig-Holsteen is ok düssen Sommer de Musik wedder en grote Thema. Dat "Sleswig-Holsteensche Musikfestival" is doch wedder in de Gang, so as jedes Johr vun Anfang Juli bit hen to dat Enn vunn August.
Wi köönt wedder dör uns Land reisen un Kunzerte besöken, soveel as wi wöllt un köönt. Goot, uns Portemonai mööt wi dorbi hebben, lever vörher al de Korten köpen. Sünst kann angahn, dat allens utverköfft is.

Wi köönt Klaviermusik in Kiel mit Wang Yuja hören, Gitarr un Fleuten op Föhr, en Matinée mit Blaasmusik gifft dat in Niemünster, Hoornmusik inn Kohstall in Pronsdörp - un de Musikfesten opt Land sünd ok dorbi - ton Bispill in Stocksee. Dat maakt Spaaß. Un worüm dat in Reinbek heten deit: Vun Mao hen na Bach? Dat hett to doon mit dat Thema vun düt Johr - un dat dreiht sik üm Musik ut China.
Is aver ok veel wat anners bi - un keen Martin Grubinger noch nich höört hett, de schull sik dat in düt Johr mal vörnehmen. Dat is de junge Slagtüüch-Speler - keeneen kann dat so goot as he. Slagtüüch is nich dien Ding? Na, denn tööv mal af, wat düsse Keerl dormit torecht kriggt. Denn snackst du anners.
Musik is in de Luft in uns Land, buten un binnen - in Stall un Schüün, man ok in feine Kunzerthallen. Dat schull een sik ok düt Johr nich ut de Nees gahn laten. Man rin int Ohr mit de Musik ut China un vun woanners!
Musikaalsche Gröten vun
Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen