100 Sekunden Platt : Maigröön

Marianne Ehlers erinnert an den plattdeutschen Dichter Johann Hinrich Fehrs, der neben Prosa auch sehr schöne Gedichte geschrieben hat.

Avatar_shz von
17. April 2013, 11:45 Uhr

Egentlich gellt he as de Novellenschriever ünner de plattdüütschen Dichterslüüd, Novellen as "Lütt Hinnerk" un "Ehler Schoof" stammt ut sien Fedder - man ok den bekannten Dörpsroman "Maren" hett he schreven. He höört in de Reeg vun de groten Plattdüütschen Klaus Groth un Fritz Reuter, liekers he ümmer en beten in den Schadden vun de beiden steiht.

Meent is Johann Hinrich Fehrs, boren un opwussen in Möhlenbarbek bi Itzhoe, lange Johren Schoolleider vun en Deernsschool in Itzhoe - un, as al seggt, Schrieversmann.

Nich blots Prosatexten hett he schreven, dat gifft en ganze Reeg feine Gedichten, de in de Wark-Utgaav to finnen sünd. Man in den lütten Gedichtband "Achter de Wicheln" sünd en poor besünners schöne tosamenstellt, mit feine Fotos ut den Kreis Steenborg dorbi.

Wi hebbt den Mai tofaten, un so hebbt wi dat bi Fehrs mit dat Gedicht "Maigröön" to doon:

Maigröön bringst du mi,

Maigröön, Marie!

De Sommer kümmt ni fröh un laat,

Kümmst du, so steiht de Welt in n Staat,

De Swolken kaamt, de Wolken gaht,

In Sünnschien lacht mi Goorn un Kaat -

Maigröön bringst du mi,

Maigröön, Marie

Maigröön bringst du mi,

Maigröön, Marie!

O Deern, nu is t ni lang mehr hin,

Denn büst du mien, denn treckst du in

Mit Kroon un Kranz as Königin -

Is noch so n glücklich Huus to finn?

Maigröön bringst du mi,

Maigröön, Marie!

So schrifft he - un wi wünscht, he schall glücklich warrn mit Marie - dat is ganz seker sien leve Fru Maria Amalie.

Dat de Mai dat beste Gröön tofaten hett, dat wünscht sik Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen