zur Navigation springen
So spricht Schleswig-Holstein

24. August 2017 | 07:29 Uhr

100 Sekunden Platt : Mai in Hamborg

vom

In Hamburg ist viel los - gerade Anfang Mai kann man dort vieles erleben. Marianne Ehlers ist dabei.

Hamborg is en Reis weert, so finn ik. Jüst inn Mai is dat wunnerschöön, bruukst gornich wiet lopen. Stiggst eenfach ut an den Dammtor-Bahnhoff un geihst röver na "Planten un Blomen". Miteens büst du in en anner Welt, allens is bunt un fein, de Vagels singt, un de Rhododendren blöht as dull. De japaansche Goorn is smuck, dat Water löppt to dien Fööt, överall kannst di hensetten un Picknick maken. Oder du geihst ant Water un haalst di Kaffee un Koken vun den Kiosk. Büst du alleen, kannst lesen un spikeleren, büst du to tweet, du un noch een, gifft dat seker noch anner Ideen.
Ok an de Alster kannst dat utholen, spazerengahn un de Swaans tokieken, en Cappuccino ant Water drinken un de Sünn geneten. Wat will de Minsch mehr! Op den Rasen sitt junge Lüüd, welk hebbt ehr Gitarr mit un singt mal en Stück. De Musikhoochschool is ja neeg bi. Af un an spazeert en Aant vörbi un söcht na wat ton Freten.

Un smucke Hunnen kannst hier sehn, all Sorten un Farven, Windhunnen un Yorkshire-Terriers, groten un lütten. Un de passlichen Lüüd dorto kannst di ok glieks bekieken.
Du magst lever an de Elv? Na kloor, dor is dat ok fein. De Wind weiht di üm de Nees, du kannst Scheep ankieken un en beten Feernweh kriegen. Överall an den Elvstrand kannst Kaffeedrinken oder wat eten - un wenn du mal richtig wiet baven sitten willst, denn gah mal hooch in dat Café vun dat Augustinum. Du büst noch nich oolt? Maakt nix, Kaffedrinken kannst dor liekers un di al mal an dat Geföhl wennen.
Hartlich Gröten vun de Elv Marianne Ehlers vun den Sleswig-Holsteenschen Heimatbund

zur Startseite

von
erstellt am 04.Mai.2012 | 02:14 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen