zur Navigation springen
So spricht Schleswig-Holstein

20. August 2017 | 14:15 Uhr

100 Sekunden Platt : Koop mal wedder in

vom

Einkaufen für Männer ist wohl nicht so einfach. Das hat Marianne Ehlers festgestellt.

Annerletzt weer ik mal shoppen – dat heet, egentlich wull ik mal kieken, wat de Mannslüüd sik in düsse Saison so över den Mors treckt. Un bavenrüm ok, dat is kloor. Na, dat güng denn so, wat ik dor so to sehn kreeg. Lange Büxen, Pullovers, Böverhemmen, Fienripp, Slipsen …. Du seggst, dat is doch nix Nieges? Ja, dor hest du mal Recht. Bi de Fruunslüüd finn ik schicke Röcke, apartige Böverdelen, fetzige Schoh, man för de Herren op düsse Eer is in düsse Saison ja reinweg nix Dulles to finnen. Tominnst heff ik nix sehn. Du meenst, dat liggt an de Keerls, de wöllt nix anners? Dat mag angahn, schaad is dat liekers.

Wat maakt wi nu? Na Paris föhren oder sülvst wat an de Neihmaschin torechtstoppeln? Also, ik kann dat nich! Mien Handarbeitslehrersche dreiht sik vundaag noch in't Graff üm, wenn se an mien krumme Nahten un mien scheve Pottlappens denken deit. Un wullen Strümp kann ik bit vundaag nich knütten.

Man villicht heff ik blots in de verkehrten Geschäften keken? Mag ween, dat gifft doch so en neemoodschen Plünnenhöker, de mal sowat richtig „Cooles“ in't Programm hett.

Wat seggst du, du köffst di en niege Jeans un en niegen düsterblauen Pullover? Goot, maak dat – man een Deel segg ik di, cool un fetzig is dat nich! Fehlt blots noch, dat du di en Hemd mit en Pullunder doröver köffst, denn sühst du ut as dien egen Grootvadder.

Nu is he vertörnt, ik mark dat al. Ik glööv, ik laat em lever in Roh, schall he doch inkopen, wat he will!

Gröten ut't Koophuus vun Marianne Ehlers vun den Sleswig-Holsteenschen Heimatbund.

zur Startseite

von
erstellt am 12.10.2013 | 06:00 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen