100 Sekunden Platt : Koolt in de Bood

Beim Aufwachen ist es kühl - und es wird auch nicht wärmer. Was tun, fragt sich Marianne Ehlers.

shz.de von
08. Februar 2013, 12:37 Uhr

Morgens bit Opstahn mark ik noch nix. Man denn in de Baadstuuv denk ik: wat is dat frisch hüüt morgen - un faat an de Heizung - ieskoolt! Ik loop eenmal dörch dat Huus, in keen Ruum is dat blots en beten warm. Dorbi is allens instellt un schall automaatsch mit de Klockentiet warm warrn.
De Kraam is twei - un buten is dat rusig koolt. Wat för en Schiet! Ik roop glieks bi den Installateur an, wat en Glück, dat de Lüüd dor al Klock halvig söven morgens bi de Arbeit sünd. Dor maak ik man jüst mien Klüsen op.

De fründliche Daam vertellt mi, dat de Technikers all ünnerwegens sünd. Dat schient so, as weer ik nich de eerste vunmorgens mit en tweie Heizung. Man se will mi Bescheed seggen, wenn de nächste Monteur Tiet hett.
Dat deit se ok - meddags Klock twölf. Ik bün bi de Arbeit un mutt gau torüch na Huus. Intwüschen hangt al meist en Iestappen över de Baadwann. Ik loop mit den Monteur rum, en Warmbuddel ünnern Arm. He söcht un kickt un prööft. De Schaltklock is twei, stellt he fast - un dorüm hett sik de ganze Kraam afstellt. Man dat System is so oolt, dor gifft dat keen Ersatzdelen mehr to, verkloort he mi. Ja un nu, fraag ik em verbaast.
Wi stellt dat hier mal op Sünn, seggt he, un dreiht an den Thermostaten. Un dat schall hölpen? Kloor, meent he, morgen is de Bood wedder warm.
Wenn dat nich klappt, schall ik wedder anropen, seggt he un is weg.
Op Sünn stellen? Un wenn de gornich schient? Ik kann dat nich so recht glöven. Man egentlich gornich so slecht: wenn mal wat nich funktschoneert in uns Leven, stellt wi doch eenfach mal op Sünn!
Gröten ut de kole Bood vun
Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen