100 Sekunden Platt : Klassendrapen

Ist es wirklich schon vierzig Jahre her seit dem Schulabschluss? Kaum zu glauben, meint Marianne Ehlers.

Avatar_shz von
19. April 2013, 05:53 Uhr

Weetst du noch? Ja, ik weet...

Dor sitt se nu tosamen, 40 Johr is dat her, dat se de Schooldöör achter sik tomaakt hebbt - twintig Jungs un Deerns, nu mit griese oder farvte Hoor. Dat Leven hett se al en goot Stück in de Gang hatt un den enen un annern ok böös anfreten.

Man nu - jüst in düssen Ogenblick - sitt se wedder tohoop in den Klassenruum, eet noch den letzten Happen vun de Rumkugel, drinkt noch en Sluuk Cola, hebbt even buten en "Stuyvesant" dörchtrocken. Glieks warrt de Düütschlehrer rinstöltern un Angela den Kopp waschen, wiel se den niegen "Asterix" studeert un "Die Räuber" an de Siet smeten hett.

Güstern weren se mit den Geschichtslehrer ünnerwegens wegen de nächst Bundsdagswahl. Willy Brandt hebbt se nich drapen, man nu hett de halve Klass den Button "Willy wählen" anstaken, jedereen an den Schipper-Pullover. Se lacht över de olen Biller, seht sik Ies un Pommes eten. De Jungs hebbt all lange Hoor un loopt jüst so as de Deerns in Parkas rum, in oliv, versteiht sik, liekers de mehrsten nix mit de Bundswehr ann Hoot hebbt. Un meist all smöökt se.

De Tiet smölt tosamen, se sünd all wedder 15 bit 16 Johr oolt, Dat Snacken, Lachen un Vertellen nimmt keen Enn. Un denn staht se wedder alltohoop, hebbt de olen Heften ünnern Arm un maakt en lütt Füür. Weg mit den olen Schiet!

Welk smiet sogor de letzten Schoolböker achterna. Goethes "Faust" un Schillers "Tell" hebbt utdeent.

Fardig mit de School, sünst nich fardig, knapp mit Geld, man den Kopp vull Ideen, rutgahn in de Welt, de Dören oprieten.

Un vundaag: sünd se nich all en wieden Weg gahn, dörch Tiet un Leven? Vundaag is güstern un villich noch morgen. Weetst du noch?

Gröten vun de Schoolbank seggt Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen