100 Sekunden Platt : Jakob sien Geschichten

Das Leben besteht aus Geschichten, so sagt Reimer Bull in seinem aktuellen Buch. Marianne Ehlers hat es gelesen.

shz.de von
01. Februar 2013, 02:20 Uhr

Jeedeen Minsch hett sien Geschichten, de he vertellt oder ok nich. Denn ut de Geschichten warrt dat Leven. Gifft dat keen Geschichten, so geev dat keen Leven, denn dat is nix anners as en lange Reeg vun Geschichten.
Een vun düsse Geschichten-Vertellers is Jakob Steen. Sien Leven schrifft he op in verscheden Episoden. Tosamen gifft dat en Bild vun dat Leven vun Jakob. Ik snack jüst vun dat letzt Book, dat Reimer Bull in dat Johr 2012 noch schreven hett, kort ehr he storven is. De grote plattdüütsche Verteller hett uns en wunnerboor Geschichtenbook nalaten.

Jakob un Willem, dat is sien besten Fründ, hebbt beid keen Fruuns mehr: "An un för sik schullen uns Fruuns ja Wittfruuns ween, mehrstendeels starvt de Mann vör de Fru. Dat hett bi uns nich klappt." So vertellt Bull. Un denn wieder: "Willem snackt inwendig mit sik sülven. He geiht sien Leven torüch, he söcht den roden Faden vun sien Leven. Mien Lebensthema seggt he. Willem is en Monothematischen. Ik bün polythematisch, in mien Leven hett dat nich blots een Thema geven. Ik söök ok keen roden Faden. Ik glööv an Tofall un an en Leven mit Löcker. Willem söcht den Roman vun sien Leven. Mien Leven sünd Geschichten."
Un so geiht dat wieder mit de beiden, de so verscheden sünd un sik doch so goot verstaht - un dat Öller miteenanner deelt. De een is ant Söken un kickt na vörn, de anner is in dat Hier un Nu. Ach, so seggt wi Plattdüütschen, wat is dat doch schaad, dat Reimer Bull nun nich mehr ünner uns is. De grote Verteller is still för ümmer. Man in de Böker is he noch bi uns, lees man mal na, gifft noch veel mehr as "Jakob sien Geschichten!"
Veel Freud bit Lesen wünscht Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen