100 Sekunden Platt : Italien inn Noorden

Wo findet man das italienische Flair hier im Norden? Marianne Ehlers verrät es in ihrer plattdeutschen Kolumne.

shz.de von
20. Juli 2012, 02:03 Uhr

Is dat nich verkehrte Welt - Italien inn Noorden? Nee, man jo nich! Nich jedereen kann richtig na Italien föhren un de Kultur, dat gode Eten un den Sünnenschien In Ravenna, Rimini un Rom geneten.
Man de mehrsten vun uns weet Raat. Meist in jede lütte Stadt hebbt wi doch en italiensch Restaurant, dat heet denn woll "Ristorante Calabrese" oder "Antonios Pizzeria" oder ok ganz eenfach "Pizza und Pasta". Un wo anners kann een so gau dat Geföhl vun Süüden un Warms un vun Urlaub kriegen as in so en Lokal.
De "Pinot Grigio" smeckt frisch un hett de richtige Temperatur - vörweg gifft dat lecker Bruscetta mit Krüderbotter, denn kümmt de "Pasta Napoli" mit Rindfleesch un Tomaten. Ok de "Pizza frutti di mare" is ganz fein. En beten Salat eet wi ok, mit Schaapskees un Oliven.

De Kellner snackt en beten mit uns - liekers he veel to doon hett, is he fründlich un hett för all de Gäst en netten Spröök. Wi laat uns Tiet bit Eten, wi sitt ünner den groten Schirm - un de Avendsünn is warm. Wat wöllt wi mehr? Beter as jüst nu kunn uns dat in Italien ok nich gahn.
Blang uns rüükt en Oleanderbusch - un an den lütten Olivenboom hangt sogor en poor lüerlütte Oliven an.
Ant Enn gifft dat noch en Afsacker opt Huus. Wi köönt uns knapp entscheden twüschen Grappa un Ramazotti. Un denn gaht wi na Huus un hebbt so dat richtige Geföhl vun Italien int Bloot. Bald föhrt wi mal richtig hen - man vundaag harrn wi "Italien inn Noorden"!
Pastagröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen