zur Navigation springen
So spricht Schleswig-Holstein

23. August 2017 | 08:42 Uhr

100 Sekunden Platt : Inn April schicken

vom

Woher stammt dieser alte Brauch? Das fragt sich Marianne Ehlers und bringt ein aktuelles Beispiel.

Wat is dat egentlich för en dösige Saak, de Lüüd inn April schicken? Wat schall dat? As wi Kinner weren, hett uns Vadder uns männichmal ann 1. April op den Arm nahmen. "Kiek, du hest en Loch in de Büx!" Oder: "Gah mal na buten, dor steiht en Peerd!" Toeerst hebbt wi dat glöövt, man bald kemen wi dor achter un hebbt vun sülven al "April, April!" ropen.
Is en olen Bruuk ut dat 17. Johrhunnert, de in ganz Europa bekannt is - un dat gifft verscheden Verkloren dorto.

Eenmal is dat niege Johr ganz, ganz fröher mal an den 1. April anfungen, een hett sik wat schenkt oder en Spaaß miteenanner maakt. As dat ümstellt worr op den 1. Januar, hebbt vele Lüüd dat nich glieks mitkregen un wiederhen dat niege Johr fiert. To düssen hett een denn "Aprilnarren" seggt.
En anner Verkloren seggt, an düssen Dag geiht de Winter un de Sommertiet kümmt, de Minsch, de in den April schickt warrt, steiht denn för den Winter.
To düt Thema warrt düchtig rümspikeleert - so ganz kloor is dat nich, woans dat kamen is mit den 1. April. Is ok so en beten ut de Mood kamen in de letzten Johren - blots int Blatt un ok int Internet warrt noch düchtig in den April schickt.
Dat is twee Johr her, do stünn en Artikel in de "Noorddüütsche Rundschau", dat de Störsleuf wedder opmaakt warrn schull. Dat is ja nu en slimme Geschicht ut de 70er Johren in Itzhoe, kann een nu nix mehr bi maken. Also, dormit leet sik keen Minsch in Itzhoe inn April schicken, man jo nich!
Man een glöövt dat nich: annerthalv Johr later geev dat in de Stadt an de Stör op eenmal en Initiativ, de wull de Störsleuf wedder opmaken. Wo kann dat angahn, hebbt de Lüüd seggt un schüddkoppt. Nu töövt all op dat "April - April"...
Hartlich Gröten ohn Schicken Marianne Ehlers vun den Sleswig-Holsteenschen Heimatbund.

zur Startseite

von
erstellt am 30.Mär.2012 | 05:57 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen