100 Sekunden Platt : Hund mit dree Been

Auch mit drei Beinen ist das Leben noch lebenswert. Den Eindruck hat Marianne Ehlers von einem Hund, den sie getroffen hat.

shz.de von
22. Februar 2013, 02:26 Uhr

Annerletzt sünd mien Fründin un ik eenmal üm den Borsholmer See lopen. Is en feinen Spazeerweg vun Eenstünnstiet, wenn een flott utpedden deit.
Ünnerwegens hebbt wi en Barg Lüüd drapen, enkelte Löpers, de de Tung al meist ut den Hals hüng - denn Lüüd mit Kinnerwagens - un, na kloor, ganz veel Lüüd mit Hunnen dorbi.
Een vun düsse Hunnen, so en ganz groten brunen, hett dat böös hild mit en dicken Knüppel. Al vun wieden warrt wi dat wies un hebbt unsen Spaaß doran. "Kiek mal, wat he sik afmarachen deit!" seggt mien Fründin. As wi neger kaamt, warrt wi dat wies: de Hund hett blots dree Been! Na sowat - un wo kann dat angahn, dat he so fit is un so fix lopen kann! Wi köönt dat gornich glöven. Ümmer wedder smiet de junge Mann, de em tohören deit, den Knüppel weg. Un de Hund rennt un haalt em torüch un leggt em stolt för em daal.

Mien Fründin snackt den jungen Mann an. Of dat den Hund goot geiht un wo dat angahn kann un so wieder. De Mann nimmt sien Zigarett ut den Mund un meent spietsch, dat kunnen wi doch woll sehn un wi schullen doch mal unsen gesunnen Minschenverstand inschalten. Oha, wi hebbt uns meist en beten schaamt. He hett ja Recht hatt. Wi hebbt dat würklich sehn, den Hund geiht dat goot. De dösige Fraag harrn wi uns ok verkniepen kunnt.
Op uns Fraag hen vertellt de junge Mann uns denn doch, dat de Hund Kreev hatt harr. Dor harr dat Been an glöven müss. Aver as al seggt, sünst güng em dat goot.
Wi sünd denn gau wiedergahn un hebbt uns seggt, na ja, he warrt seker ümmerto op den Hund mit de dree Been anspraken. Sien Reaktschoon hebbt wi verstahn. Un hebbt den Hund en lange Leven un vele Knüppels wünscht.
Gröten vunn See vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen