100 Sekunden Platt : Hen na Leck

Die plattdeutschen Kisten sind gepackt - in Leck wird Platt geübt und probiert. Marianne Ehlers spielt mal Mäuschen und hört zu.

Avatar_shz von
02. November 2012, 12:19 Uhr

Na Leck - wat is dor denn los? Ingwer Oldsen vun dat Plattdüütsche Zentrum steiht al in de Döör un töövt op de Deelnehmers vun den Zertifikatskurs "Platt för de Lütten".
Jüst hett Renate Poggensee ehr plattdüütschen Kisten ut dat grote Auto utlaadt un den Ruum mit Böker un allerhand anner Kraam ustaffeert. Glieks warrt arbeidt - mit de Spraak un för de Spraak, ganz praktisch warrt allens utprobeert, wat een in School un Kinnergoorn so bruken kann. Leder singen, Spele maken, Theater spelen, Texten lesen - Renate Poggensee weet, wat bruukt warrt för de Lütten. Siet vele Johren hett se dat Leid vun en Kinnergoorm mit twee Spraken. Platt un Hooch ganz normal in den Alldag - das is ehr Kunzept, dat se geern wiedergifft un doröver vertellt. Dat Indükern in de Spraak, dat Rinspölen in de Ohren, so löppt dat in den ADS-Kinnergoorn in Tönn an de Eider.

"För de Kinner is dat eenfach," vertellt Renate Poggensee, "de lehrt so ganz nevenbi en Spraak mehr". Un mit Schangs sünd dor denn noch Oma un Opa, de mit de Lütten noch Platt snacken köönt.
Ingwer Oldsen freut sik, dat de Lüüd bi den Kurs vun Renate Poggensee ehr Erfohren wat mitnehmen köönt. "Ut de Praxis för de Praxis - dat funktschoneert allerbest!" so seggt de Fachmann för Plattdüütsch. Nu kann he de Deelnehmers begröten - un glieks geiht de Arbeit los. Denn wöllt wi man nich länger stören, man villicht speelt wi mal "Muus" un höört en beten to, worüm egentlich nich?
Gröten vun dat Plattdüütsche Zentrum in Leck vun
Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen