100 Sekunden Platt : Heel dörch den Elvtunnel

Mit Staus muss man rechnen, wenn man von Schleswig-Holstein aus Richtung Süden fährt, das hat Marianne Ehlers erfahren.

shz.de von
06. Juli 2012, 12:32 Uhr

Man, wat is dor blots los op de Straten in uns Land! All sünd se woll op den Weg inn Urlaub oder kaamt jüst wedder oder maakt en Utflug ... Lang nich heff ik soveel Autos op een Dutt to sehn kregen. Blots stüttig un langtöögsch kaam ik vöran mit mien lütt Auto.
Un vundaag mutt ik ok noch dörch den Elvtunnel! Oha, wenn dat man goot geiht. Dor warrt ja ümmer noch düchtig buut.
"Wir bauen für Sie!" lees ik op en groot Schild. För mi? Dat heff ik noch gornich wüsst. Man wenn dat denn so is, denn will ik man tofreden sien un nich lamenteren, wenn allens en beten länger duert as sünst.
Ik slieker mi ran - un süh, so leeg is dat gornich vundaag. Villicht dorüm, wiel dat ik in de anner Richt föhr un nich na Noorden. Dor sünd al de Däänmark-Urlaubers ünnerwegens. Dat heet, wenn se denn man ünnerwegens weren! Inn Ogenblick staht se all.
Ik föhr, nich flott, aver dat kunn leger ween. Un binnen in den Tunnel geiht dat egentlich ganz goot. Mien Auto un ik kaamt vöran - un so kann ik mi al en beten op mien Urlaub freuen.
Wat op de Tour torüch passeert? Ach, dor maak ik mi nu noch keen Kopp üm. Ik föhr eenfach denn, wenn de nächste Rutsch na Däänmark hen weg is. Dat is seker klook.
Man wat is denn dat dor vörn? Ik bün doch al dörch den Tunnel! Süht ut as en dicken Stau - ik kann nich weg. Schiet aver ok!
Goot, dat ik soveel Böker mitnahmen heff. Fang ik doch eenfach mal an un lees. Blots af un an mutt ik en Stück wieder rullen. Laat man, maakt nix, denn as al seggt: "Wir bauen für Sie!"
Gröten ut den Stau vun
Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen