100 Sekunden Platt : Geboortsdag fiern

Wie oft man schon mit Freunden gefeiert hat, daran denkt Marianne Ehlers und holt das alte Gästebuch vor.

shz.de von
17. April 2013, 11:45 Uhr

Annerletzt weer bi de Frünnen en lütte Fier anseggt - nee, nix Grotes wull de Jubilar, blots en beten fein eten un drinken mit de leven Lüüd, de all de Johren to sien Geboortsdag dor weren.

Un so keem dat ok - wi hebbt uns dat goot gahn laten bi Supp vörweg, Rinnerbraden un Kartüffeln, Rode Grütt achterna, eenfach lecker.

Wo oolt he worrn is? 66 Johr - un dat gung denn ok nich ahn den olen Slager vun Udo Jürgens af: "Mit 66 Jahren...", oha!

Wi hebbt Spaaß hatt, uns veel vertellt, vun all de Festen snackt un vun wat nich all. Un mit eenmal seggt dor een: "Fröher hebbt wi doch ümmer wat in dat Gästebook schreven!" Ja, stimmt ok, dat hebbt wi ja rein ut de Ogen verloren. Dat mutt ja lang her ween.

De Huusherr kriggt dat Book her - un süh an, dat is al meist twintig Johr her, dat een vun uns dor wat rinschreven hett. Kann ja woll nich angahn, man wohr is dat doch!

Un wat dor allens binnen steiht! Wi höögt uns bannig. Dor steiht doch wohrhaftig bi den 44. Geboortsdag de Fraag, wo dat woll utsüht in de Welt, wenn de 88. dor is!

Man sowiet is dat ja noch lang nich. Nu warrt ja eerstmal de 66. fiert - un dütmal warrt, so as sik dat höört, endlich mal wedder wat in dat Gästebook rinschreven.

Dat warrt en beten melanklüterig, dat Ganze. Maakt nix, dat dörv dat ok - na all de Johren. Wat hebbt wi nich allens tosamen beleevt! Veel, veel Schönes - man ok trurige Tieden, wo de Frünnen för den Annern dor weren. So schall dat ween - un so kann dat noch en beten blieven. Wi sitt tosamen, Johr för Johr - warrt miteenanner oolt - un liekers hebbt wi dat fein, wi "Olen" - meist all hebbt al en "Söss" as eerste Johrstall. Na un wenn al, dat maakt doch nix, oder?

Geboortsdagsgröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen