zur Navigation springen
So spricht Schleswig-Holstein

20. Oktober 2017 | 18:41 Uhr

100 Sekunden Platt : Frünnen vun fröher

vom

Das sind doch die wahren Freunde, mit denen man nach Jahren so weiter sprechen kann, als wäre keine Zeit dazwischen vergangen - so hat Marianne Ehlers es erlebt.

shz.de von
erstellt am 03.Mai.2013 | 03:10 Uhr

Annerletzt heff ik Frünnen vun fröher drapen. Lang harrn wi uns nich sehn, blots ümmer mal vuneenanner höört, mal telefoneert oder en Mail schreven, to Wiehnachten en smucke Koort - dat weer dat denn över Johren.

Man nu hebbt wi uns verafreedt - un vörher al heff ik mi en Kopp maakt: warrt wi uns noch wedderkennen, wi sünd ja all en Stück öller worrn - warrt wi uns noch verstahn, hebbt wi uns noch wat to seggen? Is doch so, dat Leven un de Tiet hett uns uteneen dreven. Veel is passeert över de Johren in de Familien, int egen Leven, un veles is anners worrn.

Man denn keem uns Drapen, un wi sünd wohrhaftig dor anfungen to snacken un to vertellen, wo wi ophöört harrn domals. Keen frömdes Geföhl, keen Unseker-Ween. Dat weer meist, as weer de Tiet tosamensmölt. As harrn wi güstern den Satz half anfungen - he hüng noch in de Luft - un vundaag to Enn bröcht. Schöön weer dat, en gode un warme Geföhl is opkamen. So is dat mit Frünnen!

Un seht wi uns nu in teihn Johr eerst wedder, denn warrt dat jüst so ween. Man so lang schall dat düt Mal nich duern, dat hebbt wi uns verspraken. Kriegt wi dat hen? Mal sehn. Wi mööt uns sülven an de Hand nehmen un uns dat vörnehmen. Allens wat wichtig is, dat lett sik regeln. Un wat is denn woll wichtiger in uns Leven as de Minschen, de uns vun fröher her kennen doot - un de ok vundaag noch en Draht hebbt to uns. Un düsse Draht schall man jo nich tweirieten. Dat wünsch ik mi ganz dull!

Fründschopsgröten vun Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen