zur Navigation springen

100 Sekunden Platt : Föhlen int Fröhjohr

vom

Ein kurzes Gastspiel hat er diese Woche gegeben, der Frühling. Was es mit den Frühjahrsgefühlen auf sich hat, versucht Marianne Ehlers zu ergründen.

shz.de von
erstellt am 08.Mär.2013 | 08:04 Uhr

Segg mal, wo föhlst du di nu egentlich? Büst du mööd, slapp, slecht tofoots? Worüm ik dat fraag? Naja, ik wull ja man blots mal weten, wat di dat Fröhjohr in de Knaken sitt - oder ok nich.

De Märzsünn lacht di int Gesicht, ok wenn dat mitünner noch fies koolt is. Ann leevsten wörrst du mal na Fuerteventura utneihen, man du hest keen Urlaub. Morgens kümmst du nich so recht ut de Puuch - un wenn du denn opstahn büst, denn bruukst du tominnst veer Tassen Kaffee. Eher kümmst du nich togang.

Na de Arbeit willst du to Foot na Huus lopen, man ünnerwegens hest du op eenmal keen Lust mehr un föhrst dat letzt Stück doch noch mit den Bus. Oha, dat mutt aver mal anners warrn - so schimpst du mit di sülven. Un denn kümmst du int Simmeleren. Fröhjohr, Fröhjohr, dor weer doch noch wat? Ja, nu fallt di dat in. Int Fröhjohr schöllt doch ok noch so anner Geföhlen in de Gang kamen. Ach, denkst du, sowat müchst du ok geern mal wedder föhlen, dat weer wat! Blots, wiet un siet keen in Sicht, för de sik so en Föhlen lohnt. Den Winter över weerst du alleen, hett di ok gornix utmaakt. Du müss di eerstmal vun dien Ex verhalen. Man nu fallt di all so n gediegen Kraam in, dat Leed vun Veronika ton Bispill mit den Spargel, do dor wassen deit, o man!

Du wöhlst di hooch vun dien Sofa un geihst int Nett. Wo weer dat denn mal mit "Parship" oder "GroteLeev.de"? Ach nee, dat hett doch bi dat letzte Mal al nich klappt. Na, so ganz stimmt dat nich, eerst hett dat klappt, man na veer Weken nich mehr. Hett nich mal bit Wiehnachten langt, de Leev. Un du wullst doch endlich mal de Fierdaag mit Romantik tobringen. Man dat romantisch Föhlen weer al vör Dodensünndag in de Grütt.

Schiet ok, wat maakst du nu? Gah inn Goorn un arbeit dien Fröhjohrsföhlen af. Villicht kümmt dor denn mal een vörbi, de dat ok so geiht - un de drückst du denn de Hark in de Hand un...

O kiek mal, wokeen dor jüst um de Eck kümmt! Veronika...

Föhlig Gröten vun Marianne Ehlers vun den Sleswig-Holsteenschen Heimatbund

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen