100 Sekunden Platt : Fit warrn un blieven

Was tut man nicht alles, um lästige Pfunde los zu werden, doch leider hapert es bei vielen an der nötigen Disziplin, stellt Marianne Ehlers fest.

Avatar_shz von
25. Januar 2013, 02:45 Uhr

Dat is doch ümmer wedder datsülvige: in jeedeen Johr glieks Anfang Januar geiht dat los mit dat unbannige Sportmaken! Över de Fierdaag hebbt sik de Lüüd den Speck anfodert - na goot, en Deel dorvun weer seker vörher al dor - un nu schall he wedder rünner. Man dat is nich so eenfach! Eerstmal heet dat: FDH oder ok Diät, mal de un mal de. Ik heff nu wohrhaftig keen Lust, allens optotellen, wat dat so gifft.
Doch een Deel will ik verraden: morgens Kohlenhydraten un avends nich - oder weer dat annersrum? Dat schall wat bringen! Un denn mutt een sik rögen. Also, fix hen na dat Fitness-Center un sik beraden laten, düchtig Geld betahlen - un mit veel Elan Zirkeltraining, Radfohren binnen un wat sünst noch so anbaden warrt, afarbeiden.

Oha, de Punnen pultert dal, dat is doch fein. Blots in de drütte Week steiht jüst an den Fitness-Dag en Geboorts-dagsfier op den Kalenner. Na, eenmal utfallen laten is ja nich slimm! Un wat dat dor Feines to eten geven hett, eenfach lecker! De Week dorna hebbt wi Kunzert-Korten - un vörher draapt wi uns bin Italiener. Naja, maakt ja nix, eenmal is keenmal. Dat meent de Fründin ok, de in de Week dorna en Filmavend organiseert hett. Nu sünd wi al en beten ut den Tritt - un denn kümmt dat grote Verköhlen ...
In Week Nummer söven hebbt wi keen Lust un blievt eenfach opt Sofa liggen. Also Lüüd, so kann dat ja nix warrn mit de Fitness - nu man los, in de Gangen! Blots denn fallt uns de dösige Snack vunwegen "Sport is Mord" in - un jedereen weet en Geschicht dorto. So hoolt wi eerstmal op mit dat unbannige Sportmaken, bet, ja bet de Baadsaison vör de Döör steiht. Sportlich Gröten vun Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen