100 Sekunden Platt : Dreemal Sport ann jeden Dag

Vom Alltags-Triathlon erzählt Marianne Ehlers. Zumindest im Urlaub ist es zu schaffen. Laufen - Schwimmen - Radfahren!

Avatar_shz von
25. Juli 2013, 06:22 Uhr

"Lüüd, ik mutt mal wat för mi doon!" So seggt uns Fründ un Naver Markus annerletzt bi uns Grillavend. Oha, wat meent he denn dormit? Jüst hebbt wi uns Grillwuss un de inleggten Steaks wegneiht - Broot un Kantüffelsalat dorto... een, twee Beer un een, twee Kööm.
All snackt wi dörcheenanner. "Büst du to dick, oder wat?" "Hest du keen Knööv mehr, oder wat is mit di?" "Sport is Mord, ik segg di dat..."
Markus böhrt de Arms hooch. "Nu swiegt doch mal still, ik verkloor jem dat."
Un denn meent he, dat he nu in dat Öller kümmt, wo dat eenfach nich mehr langt, eenmal de Week teihn Kilometer Rad to fohren oder all twee Dag to Foot ton Rundstücken halen to lopen. De Punnen sett sik as vun sülven an, kannst meist tokieken. Dor hett he Recht, dat hebbt wi ok al markt. Nu wöllt wi aver weten, wat Markus denn nu vör hett. Jeden Dag Lopen? Swemmen? Radfohren?

"Allens richtig," smuustert he. Un denn verkloort he uns sienen Plaan. He nöömt dat ""Alldags-Triathlon". Eerst bringt he ann fröhen Morgen sien Fohrrad hen nat Swemmbad. Un denn geiht dat richtig los. He löppt en örnliche Stück dörch de Feldmark. Mit twee, dree Kilometers fangt he an. Also, he löppt den Törn un kümmt denn wedder bit Swemmbad an. Un denn kümmt de tweete Deel: he swemmt de 25-Meter-Bahn solang, bet he tominnst een Kilometer schafft hett. Nu kümmt Deel dree, dat Radfohren. He strampelt los un schafft ok so üm un bi 20 Kilometers, na baven apen.
Wi sünd heel verbaast, dat he so fit is. Denn gifft he aver to, dat he noch bi de Theorie is. Dat ganze Ünnernehmen schall nu losgahn. Nu inn Urlaub, is doch de beste Tiet för sowat.
10 Daag later draapt wi uns wedder ton Grillen. Markus kümmt mit Rad ansuust, hett Loopschoh un blots en Badebüx an. "Na, Sportsfründ, wo geiht di dat denn so?"
"Super!" strahlt he. "Ik bün goot in de Gang mit mien Urlaubs-Triathlon - blots wo ik dat maken schall, wenn ik wedder arbeiten mutt, dat weet ik noch nich. Ik kaam ja to nix anners mehr!"
Also, fit süht he ja ut, wi graleert em un besluut denn gau: dat maakt wi anner Johr ok, Urlaubs-Triathlon! Höört sik goot an! Un för den Alldag mööt wi uns wat anners överleggen - villicht: Spazeren - Arbeiten - Kaffeedrinken. Sünd doch ok dree Delen, oder nich?
Triathlon-Gröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen