100 Sekunden Platt : Dree König un en Steern 2012

Die Sternsinger ziehen durchs Land. Und Marianne Ehlers wünscht allen Lesern und Hörern viele Sterne für 2012.

shz.de von
06. Januar 2012, 02:09 Uhr

Güstern weren Caspar, Melchior un Balthasar ünnerwegens. Hest du ehr drapen? Nee? Dat is schaad.
Goot, inn Noorden sünd nich soveel Königen ünnerwegens, is mehr in de kathoolschen Rebeten. Liekers, af un an süht een dree Kinner, verkleedt as de Königen ut dat Morgenland, de mit en Steern op de Spitz ünnerwegens sünd, de Lüüd den Segen för dat Huus bringt un mit witte Kried de Bookstaven vun ehr Naams över de Döör schrievt - un dat Johr dorto. Nu kann nix mehr passeren.

Int Landshuus in Kiel sünd de dree in jeedeen Johr to Gast, so ok nu in 2012. Meisttiet sammelt se för en gode Saak int Land - un dorför gifft een denn ok geern mal wat.
2012 - noch föhlt sik de Tall en beten frömd an, man wo gau hebbt wi uns an ehr wennt un bruukt ehr, as harrn wi nienich wat Anners schreven as düsse Tall. Man laat uns den Steern vun de Königen nich vergeten - he schall ok düt Johr bi uns blieven.
Kiek doch, dor steiht jüst een ann Heven! Un dorto fallt mi düt Gedicht in:
De Steern
Buten steiht en Steern
mien Steern
ik seh em
wull he weer mien
man he blifft buten
vör de Döör
strahlt in en Tiet
en Tiet de kümmt
dat duert
un denn
fallt he in mien Schoot
de Steern
Dat Se all, dat uns all in düt meist noch frische Johr 2012 ganz veel Steerns inn Schoot fallt, dat wünscht Se mit beste Niejohrsgröten
Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen