100 Sekunden Platt : Drapen mit Hein un Herrn Momsen

Auf der Landesgartenschau in Norderstedt wird dieses Wochenende Platt gesprochen. Marianne Ehlers ist dabei - neben Hein und Herrn Momsen.

shz.de von
09. September 2011, 03:36 Uhr

Vundaag un morgen draapt sik de Plattdüütschen in Norderstedt mang Sünnenblööm un Dahlien, twüschen Krüder un Gras.
Ja richtig, op dat Gelänn vun de Landsgoornschau is Platt anseggt. Dat ganze Wekenenn kann een plattdüütsche Töön to hören kriegen. Dor warrt Theater speelt un Musik maakt, dor kann een plattdüütsche Schrieverslüüd tolustern un sien Kinner bi en Speelnameddag afgeven. Hein, de grote Popp, kann blots plattdüütsch snacken un freut sik över Lütt un Groot, de mit em snötert.

Een kann sik ok op Platt dörch dat ganze grote Gelänn föhren laten - dor gifft dat en Barg Intressantes to hören un to sehn. Dat kann angahn, dat merrn twüschen de Blomen een mit de Gitarr steiht un plattdüütsche Leder singt, nich blots "Dat du mien Leevsten büst..." Sogor "Herr Momsen" löppt rum un sabbelt de Lüüd vun de Siet an. Keen dat is? Dat mutt de Besöker sülven rutfinnen.
Ann Sünndagmorgen kann een dat Telt vun den Heven besöken. Ja, dat is düsse grote Glaskuppel, dor finnt en plattdüütschen Gottsdeenst statt.
De NDR is dorbi as Medienpartner - un na kloor, de Sleswig-Holsteensche Heimatbund, de Platt-Partner int Land. Denn man to, gau los na Norderstedt - denn dor schient vundaag de plattdüütsche Sünn!
Blomengröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen