zur Navigation springen

100 Sekunden Platt : De Sommerkark in Welt

vom

Sie ist wahrlich eine Frau von Welt: unsere Plattdeutsch-Kolumnistin Marianne Ehlers. Heute erzählt sie von einem einzigartigen Kulturprogramm auf der Halbinsel Eiderstedt.

shz.de von
erstellt am 19.Jul.2013 | 03:55 Uhr

Wat schall dat bedüden - Kark blots in Sommer? Un inn Winter is nix los? Nee, dat hett wat ganz Anners op sik.
Jedes Johr inn Sommer, mehrstiets in de Maanden Juli un August gifft dat en wunnerboor Kulturprogramm in de Kark St. Michael in dat lütte Dörp Welt op de Halfinsel Eiderstedt. Tostännig is Henning Röhl ut Husum. Besökers vun neeg bi un wiet weg, Urlaubers un Lüüd vun dor, kaamt ton Kieken, Hören un Klookwarrn.
Un klook warrn kann een bi dat Programm. Een kann sik de utstellten Biller ankieken, en Kunzert mit Musikers ut Dresden anhören, wat över China un den Südpol to weten kriegen. Man ok de Landschop Eiderstedt un de lange Karkengeschicht in de Region is en Thema - sogor Shakespeare un Folkmusik is dorbi.

Worüm ik dat allens vertell? Nu, dat lohnt sik, mal en Welt-Utflug to maken. Is schöön dor op de Halfinsel an de Westküst. Dat weet ik, denn ik bün dor groot worrn.
In St. Michael in Welt bün ik kunfermeern worrn - un kort dorna güng de ole Orgel twei. Wat nu? Geld för en niege weer jüst nich dor. Man de Karkengemeen wüss Raat, denn se harr ja noch en Kark mehr, St. Martin in dat Naverdörp Vollerwiek. So wöör de Welter Kark erstmal dicht maakt - un de Gottsdeensten in Vollerwiek afholen. Lange Johren leep dat so - denn maak de Karkenkreis ut St. Michael en Veranstaltens- un Museums-Kark. De Welter Sommerkark mit ehr Programm weer boren.
Verscheden Lüüd hebbt sik över de Johren um en godes Programm sorgt - un dat allerbest klappt, ok in düssen Sommer is dat jüst so.
Un noch wat: düsse slichte un schöne ole Eiderstedter Kark is ok dat, wat ehr fröher tostahn hett: hier kann döfft un heiraadt warrn - un schall een to de letzte Roh kamen, denn draapt sik Familie un Frünnen in St. Michael un gaht naher hen na dat Graff op den olen Karkhoff.
Gröten ut de Welter Kark seggt Marianne Ehlers vun den Sleswig-Holsteenschen Heimatbund

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen