zur Navigation springen
So spricht Schleswig-Holstein

26. September 2017 | 14:57 Uhr

100 Sekunden Platt : De Plöner Markt

vom

100 Sekunden Platt: Anlässlich des Stadtjubiläums von Plön erzählt Marianne Ehlers vom bunten Treiben auf dem Wochenmarkt.

shz.de von
erstellt am 26.Aug.2011 | 02:54 Uhr

De Welt is bunt, dat Leven ok - man dat is nix gegen den Markt in Plön. Tweemal de Week versammelt sik de Markt-Beschickers ünner den Plöner Karktoorn. De mitt 60 Meter - un is jüst so hooch as de Plöner See deep is.
Is Jubiläum in de Stadt: 1236 hett Plön dat Stadtrecht tospraken kregen, man dat Marktrecht is noch recht wat öller. Fröher, as de B76 noch merrn dörch Plön güng, weer Markt achter de Kark - nu is he in de Footgängerzoon, 34 Stännen an’n Diensdag, ann Freedag sünd dat sogor 40.
An twee Steden kannst frischen Fisch köpen, an dree Steden gifft dat Gröönkraam: Kartüffeln un Tomaten, Kürbis, Wuddeln, Bohnen, allens, wat een sik denken kann.

Ok Tüüch kann een kriegen, smucke Blusen un bunte Pullovers. Glieks üm de Eck rüükt dat "aromatisch". Dor gifft dat Kaffee un "Kolen Hund", ok "Swarte Peter" nöömt oder "Igel". Un en Stück wieder langs Kees, all Sorten, is dat Enn vun weg. De Imker is ok dor mit den frischen Honnig vun 2011.
Denn de Kortwaren: so en Stand gifft dat blots eenmal in Sleswig-Holsteen: hier finnt een allens ton Neihen un Strichen, Gummiband un Börsten.
Dat is nu mal wat: Fleesch un Wust vun kralle Angler Saddelswiens, dat smeckt eenfach goot. De Bio-Bäcker is ok dor.
De Goorner priest "Jiaogulau" an: "Kraut der Unsterblichkeit". "Jedeen Dag een Blatt, denn warrst hunnert!" seggt he. Goot, wi seht uns wedder in hunnert Johr - op den Plöner Markt, dor, wo dat Leven un de Welt is, bunt un vun allens wat. Un de Plöner See? De is denn sachts immer noch 60 Meter deep, jüst so veel as de Karktoorn hooch is.
En hartlich Graleren na Plön un bunte Marktgröten vun Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen