100 Sekunden Platt : De platte Tiroler

Was unterscheidet das Wandern in Tirol von dem in Schleswig-Holstein? Darüber macht sich Marianne Ehlers heute ihre Gedanken.

Avatar_shz von
02. September 2011, 09:21 Uhr

Kennst du em, den Tiroler vun dat platte Land? Ik kenn een, de kümmt ut Sleswig-Holsteen. Jüst ut dat Land, wo dat meist keen Bargen gifft - un wenn, denn sünd se nich veel höger as en Diek un du büst gau baven.
Un dorüm mutt düsse Minsch alle poor Johr mal dal na Tirol un sik de Bargen ankieken. Kloor, he wannert ok un wunnert sik ümmer wedder, dat de Weg nich in Kilometers angeven warrt, man in Stünnen.
Dor kümmt he eerst nich so recht mit kloor, bruukt en beten, bit he sik dor an wennt hett.
Man dat is ja normal, geiht doch nich anners, löppst ja nich eenfach liekut un üm de Kurv, so as bi uns in Sleswig-Holsteen, nee - du musst op un dal, un dat duert nu mal sien Tiet. Bruukst di egentlich nich üm de Kilometers quälen, denn büst blots frustreert, wiel dat du denkst, du hest nix schafft. Stimmt aver man jo nich.

Un denn büst du op den Barg, freust di, dat du so wiet dal kieken kannst. Dat Water löppt den Barg dal, rin in den groten See mit de Staumuer. Denn höörst du wat fleuten, sühst wat griesbrunes, meist so as en Meerswien. Ja richtig, en Murmeltier - dor laat ik mal dat hoochdüütsche Woort, denn so en Deert kennt wi nich in’n Noorden un hebbt dorüm ok keen Woort dorför. Överall bimmelt dat, jüst so as in den Heimatfilm ut de 50er Johren - de Kohklocken gifft dat ümmer noch.
Nu is Tiet för Kaffee un Koken op de Hütt, dat hett sik de Wannersmann oder -fru aver verdeent! Kannst di an wennen, an Marillenkoken mit Slagrohm, an Germknödel mit Mohn un Plummenmoos un ok an Appelstrudel mit Vanillesooß.
Denn föhrt he torüch, uns Tiroler vun dat platte Land, freut sik wedder op sienen Diek un dat Kieken över dat wiede Water - un nimmt sik glieks vör, mal dörch Sleswig-Holsteen to wannern - dor, wo de Weg in Kilometers angeven is.
Beste Wannergröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen