zur Navigation springen

100 Sekunden Platt : De Fischprinzessin und de Snieder

vom

Marianne Ehlers erzählt ein altes schleswig-holsteinisches Märchen von Wilhelm Wisser - natürlich auf Plattdeutsch.

shz.de von
erstellt am 21.Sep.2013 | 06:00 Uhr

Dor is mal en Prinzessin ween, de is in en Fisch verwünscht ween. Un all Meddag Klock twölf, denn is se in 't Water ünnerhööcht kamen. Denn is se baven en Minsch ween un nerrn en Fisch. Un wenn ehr in de Tiet een hett to'n Spreken kriegen kunnt, denn is se erlööst ween. Un de hett ehr denn to Fru hebben schullt.

Nu sünd dor al so veel kamen, aver keeneen hett dor Spraak in kriegen kunnt.

Do kümmt dor ok mal en Snieder anreisen, de kriggt dat ja ok to hören. Un do geiht he hen na den König un sprickt dor üm an, wat he dor nich mal hen schall.

De König, de will dat eerst ja nich.

As de Prinzessin nu ut dat Water kümmt, do fangt de Snieder an to vertellen:

Dor is mal en Bildhauer ween, un en Snieder un en Dokter, de gaht mal tosamen dör dat Holt. Do seggt de Bildhauer, he will ehr mal wiesen, dat he sien Kunst verstahn deit. Un he kümmt bi – dor liggt so en groten Block in't Holt – dor haut he enen Minschen ut. Do is dat ganz natürlich ween as en Minsch. Blots, dat hett ja nich leevt. Do seggt de Snieder, denn will he ehr ok mal wiesen, dat he sien Kunst verstahn deit. Un do nimmt he Blääd, dor neiht he Kleder vun, dat hett ganz natürlich utsehn as en Minsch, de Tüüch anhett. Do seggt de Dokter, denn will he ehr ok mal wiesen, dat he sien Kunst versteiht. Un do kümmt he bi un puust dor Aten in. Do is dat en ganzen natürlichen Minschen ween. Do seggt de Prinzessin, as de Snieder dat vertellt hett: Keerl, du lüggst!

Do hett de Snieder ehr ja to'n Spreken kregen. Un do is se wedder to enen Minschen worrn. Un de Snieder hett ehr as Fru kregen.

Wilhelm Wissers Märkengröten vun Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen