100 Sekunden platt : Dat sünd de Olchis

Diese Figuren lieben Absonderliches und Ekliges: die Olchis hat Marianne Ehlers beim Stöbern in einem Kinderbuch entdeckt. Sie mögen es besonders, wenn es "olchig" riecht.

Avatar_shz von
05. April 2013, 01:17 Uhr

Vör vele Johren hett de Kinnerbook-Schriever Erhard Dietl mal Böker över de Olchis schreven. Wokeen dat sünd? Na, ik will mal en beten vun düsse besünnern Figuren vertellen.

Olchis hebbt dree spitze Höörns ton Hören, keen Ohren. Se köönt Ameisen hosten un Regenwöörms opstöten hören, un wenn dat Gras wasst, deiht se dat in de Höörns weh.

Ehr knubbelige Näsen rüükt geern Schimmel un fuligen Stinkkraam. Wenn wat ganz dull stinkt, freut sik de Olchis un seggt: "Mmmh, rüükt dat fein olchig!" Un denn haalt se ganz deep Luft, so as wi, wenn wi frische Gras oder Blööms rüükt.

Ann leevsten hüppt Olchis in de Schiet rüm. Wenn se sik sülven en Freud maken wüllt, haalt se sik en Badewann vull Water mit Kleischiet mang rin na de Stuuv un baadt dor binnen.

Se freut sik, wenn se in den Müll leckern Kraam finnt. Se eet un drinkt geern wat Scharpes un wat Bitteres. Se kaut geern op ole Gummireifens rüm, knabbert an rustige Blickdosen un pudert sik mit en Doos Pepper in! Över en ole Buddel mit en Rest Shampoo in köönt se sik düchdig freuen un drinkt dat foorts ut.

Olchis wascht sik nie. Dorüm stinkt se so fein fuulig. Se stinkt so dull ut den Hals, dat de Flegen doot afstört, wenn se de Olchis to neeg kaamt.

In stinkige Rook un Qualm föhlt se sik besünners kommodig. Wenn Autos an se vörbiföhrt, freut se sik över dat Gas ut den Utpuff. Dorüm wahnt se so geern an de Autobahn, dor, wo de Luft so richdig schön stinkig un schietig is. Mitünner geiht Olchi-Mama mit ehr Kinner spazeren un seggt se Bescheed: "Ach du hillige Müllsack, dat is en feine Luft vundaag, nu snuuft mal deep dörch, dat is gesund!"

Nu man keen Sorg, as al seggt, dat hannelt sik um Kinnerbook-Figuren.

Olchi-Gröten vun Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen


Nachrichtenticker