100 Sekunden Platt : Dat niege Johr

Alles fühlt sich noch neu an - und vieles ändert sich in diesem Jahr. Marianne Ehlers bringt einige Beispiele.

Avatar_shz von
11. Januar 2013, 03:22 Uhr

Noch föhlt sik allens frisch an: de Kalenner ton Afrieten is noch dick, de grote mit de smucken Biller wiest man jüst de eerste Siet - un allens, wat wi uns vörnahmen hebbt för dat Johr 2013 is noch nich över Bord smeten.
Ann Schalter bi de Bank heff ik en beten tögert, binah harr ik doch ut Versehn 2012 schreven! Man inn letzten Momang kreeg ik de Kurv. Goot, de "Dree" ant Enn seeg en beten gediegen ut, en Stück to lang, man de junge Bankfru meen, dor kunn een klook ut warrn. Glück hatt!
Bi de Post müss ik denn en ganzen Swung "Dreen" köpen. Woso dat? Na, wegen dat Porto, dat nu 58 Cent un nich mehr 55 kosten deit. Un nu mutt ik bi jeedeen Breef so en lütte Mark mit en grote Dree op tobacken. Ik kann mi nich besinnen, dat sowat al mal weer. Kunn een nich fröher de olen eenfach opbruken oder heff ik mi dat verkehrt markt?

Ach, na mien Dokter weer ik glieks na Neejohr ok al hen, mien Ischias, weetst Bescheed? Ik stünn al mit mien Portemonai in de Hand, do seggt de fründliche Spreekstünnendaam: "Deit nich mehr nödig, is doch nu afschafft!" Ach ja, ik harr dat doch leest int Blatt un int Radio höört. Glöven dee ik dat nu eerst. Wo wenig kümmt dat vör, dat mal wat nich höger ropsett warrt. Man of uns düsse Null-Nummer nu hölpen warrt? Egal, ik freu mi un steek mien Schiens wedder weg. So gau kann een teihn Euro verdenen, is dat nich fein?
Jüst kümmt mi de Idee, noch gau inn Buumarkt en beten wat gegen de Rötten op mien Böhn to köpen - för teihn Euro - man denn fallt mi dat in: Röttengift dörv blots noch de Kamerjäger köpen. Hebbt se int Radio vertellt.
Schiet ok, wat maak ik denn nu mit dat vele Geld?
Dat fraagt in de erste Januar-Week Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen