zur Navigation springen
So spricht Schleswig-Holstein

19. August 2017 | 23:10 Uhr

100 Sekunden Platt : Babylon is gornix

vom

Unglaublich, was für ein Sprachengewirr auf der Kieler Woche herrscht! Marianne Ehlers hat zugehört.

Jedes Johr inn Juni freu ik mi al düchtig op de Kieler Week. Man, wat heff ik dor nich so allens beleevt över de Johren! Feine Musik, nette Lüüd, Seilschippen kieken, un wat een allens so to hören kriggt!
Neven mi höör ik gediegen Wöör, ik kann dat nich klook kriegen. Ach so, de Deern kümmt ut Sassen un meent mi. "Gänse mal e Schdügg weidergähn?" Ik bruuk en Tiet, ehr ik ehr verstahn heff. "Ach so, ik schall di Platz maken, worüm seggst du dat nich glieks?" anter ik op Platt.

Mien Kumpel versöcht jüst, sien Schoolfranzöösch op Schick to bringen un brickt sik dorbi meist de Tung. "Quel age a tu?" fraagt he de lütte Deern mit de swatten Ogen. "Sowat fraagt een nich!" tuster ik em scharp to. "Ik weet, man ik kann nix anners mehr, ik bün dörch mit mien Programm." Nu fang ik an un marach mi af mit Franzöösch. Man as ik "Vive la France" roop, dreiht mi de smucke Deern den Rüch to.
Na, denn nich, gifft ja ok noch anner Lüüd. Klaartje steiht nu direkt bi mi. Se lacht un vertellt - man ik bün verbaast: ik wüss gornich, dat ik so goot hollandsch verstahn kunn! Na ja, de Spraak stammt ja ok vun dat ole Platt af, denk ik, un anter ehr denn ok driest op Platt. Jungedi, dat geiht ja allerbest, ik bün heel tofreden mit de Kommunikatschoon.
Klaartje treckt wieder - un nu stah ik bi Pierre un Marie. Wat is dat denn för en Spraak? Dat is Moselfränksch, verkloort mi de beiden Oolt-68er, warrt an de Grenz vun Elsaß-Lothringen snackt. Ach so!
"Ja mei, du hier?" gröölt mi een vun achtern an. Ulrich, de Bayer ut mien Schoolklass, ik glööv dat ja woll nich! "Magst a Bier? A Maaß habts ihr ja net hier oben". Seggt dat un drinkt dat Beer in een Tog ut.
Minsch, wat is hier al wedder los, vör luder Snacken un vör luder Spraken krieg ik dat Musik-Programm meist gornich mit. Spraken op un dal - un Platt merrnmang, Babylon is doch gornix gegen de Kieler Week, jedes Johr inn Juni!
Gröten vun de Kieler Week seggt Marianne Ehlers vun den Sleswig-Holsteenschen Heimatbund.

zur Startseite

von
erstellt am 12.Jun.2013 | 03:22 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen