100 Jahre Platt : 100 Johr Plattdüütsch Gill Eckernför

In Eckernförde wird der 100. Geburtstag eines wichtigen plattdeutschen Vereins gefeiert. Marianne Ehlers ist dabei.

shz.de von
12. Oktober 2012, 11:46 Uhr

Dat is doch mal en Fest weert: De "Plattdüütsch Gill Johann Hinrich Fehrs" in Eckernför is 100 Johr oolt worrn. An düssen Sünnavend warrt düchtig fiert in de Stadt, över Meddag mit en Festakt un avends mit en bunte Programm.
Karl-Heinz Groth, siet lange Johren Vörsitter vun de Gill, freut sik över düssen Dag. De is nu ganz passlich inbunnen in de Plattdüütschen Kulturdaag in Eckernför, de all twee Johr op de Been stellt warrt.
Veel is beschickt worrn vun de Gill för de Spraak: Theater, Utfohrten, Lesungen un noch veel mehr warrt de Maten baden, un de Tospröök is ümmer goot.

Dat de Gill den Naam vun den groten sleswig-holsteenschen Schrieversmann Johann Hinrich Fehrs kregen hett, dat freut de jünger Süster, de Fehrs-Gill. De kann vunt Öller her nich ganz mitholen. Erst 1916, in dat Doodsjohr vun Fehrs, is se grünnt worrn. Man an düssen Dag kümmt de Vörsittersch ton Graleren vörbi. Un kloor is ok: ok de Sleswig-Holsteensche Heimatbund as Dackverband vun de Plattdüütsch Gill graleert vun Harten un is bi dat Fiern dorbi.
Un ok hier passt mal wedder de ole Snack:
100 Johr - en lange Tiet, wenn een se vör sik liggen süht.
100 Johr - en korte Spann, wenn een se kickt vun achtern an.
De Gill schall leven - un de Maten kiekt mit Toversicht un Moot na vörn. Se all wöllt noch lang för de Spraak wat doon. Man nu warrt eerstmal fiert!
Op dat Fest freut sik Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen