zur Navigation springen

Sommer vun achtern

vom
Aus der Redaktion des Holsteinischen Couriers

Kiek doch mal, de brunen Blääd dor op den Footstieg ...

Wo is he denn nu afbleven, düsse wunnerbore Sommer, de sien’ Naam verdeent hett – is he al utneiht? Dat wöllt wi doch nich höpen.

Doch tööv, ik seh em noch, man nu meist al vun achtern. He is noch nich weg, so en lütt Stück kriegt wi em ümmer noch tofaten.

Fein doröver dichten kunn Ernst Otto Schlöpke, de Dichtersmann vun Niestadt an de Oostsee – pass mal op:

 

September

Ik heff hüüt den Sommer vun achtern sehn.

He dreih den Kopp, plink mi to

un streck sik un möök noch mal so

verschaamt op lustig: swunk mit de Been,

as speel he en jungshaftig Footballspeel!

… Mit wat?

Mit ’n Blatt!

Mit hupenwies Bläder. Un de weren geel.

Un bruun. Un griesfarben oolt weer dat Gröön –

dat Gröön in sien Ogen, as he -

noch eenmal – mi toplinken dee.

Ik heff hüüt den Sommer vun achtern sehn.

 

Is dat trurig? Nee, egentlich nich. Dat is de Loop vun dat Johr un nix anners.

De Metereologen fangt nu al an, den Sommer adjüüs to seggen – wi annern töövt noch en beten dormit. Man liekers is dat in düssen Maand sowiet, wi köönt dat nich ännern.

In’n Goorn blöht noch allens as dull: Dahlien, Astern, dat Un-, paddong Wildkruut – un de Appeln sünd riep un lücht an’n Boom. Dat is en Staat un fein antokieken. Kloor, naher kümmt Arbeit op uns to: Appelmoos un Appelsaft maken – twüschendör Appelkoken mit düchtig Slagrohm geneten. De Plummen sünd ok lecker, dor kann ok en Barg mit opstellt warrn in uns Harvstköök.

Man de Rasen wasst langsamer, so dünkt den Goorn-Böversten dat tominnst. Hett he keen Lust mehr to’n Rasenmeihen? Dat lett meist so. Maakt doch nix, anner Johr geiht dat wieder. Is doch so en Larm-Maschin, de dor ool Benziner. Ik bün froh, wenn ik dat Dings düt Johr nich mehr hören mutt. Achtern in’n Schuppen is doch en gode Platz för den Meiher. De is nu fein reinmaakt, öölt un mit en ole Wulldeek inwickelt. Is ja rechttiedig, ik weet, man denn hebbt wi de Arbeit al mal achtern uns. Blifft ja noch noog to doon nu in’n Harvst, is doch so, nee?

Wat seggst du, ik schall mi mal ümdreihen? Oh nee, dat glööv ik nu nich …!

 

 

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen