100 Sekunden Platt : Water, Wind un Badebüx

Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.
Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.

Statt einer Reise in die Ferne geht es an den Strand. Marianne Ehlers erzählt von den Vorbereitungen der Familie.

shz.de von
28. Juni 2014, 06:30 Uhr

Is dat nich fein? Sommer is dat in uns Land – is ja meist nich to glöven! Ik freu mi as dull, man en beten länger Henkieken op dat Konto un en kort Rinschulen in’t Portemonai seggt mi glieks: en richtig schöne lange Reis is nich binnen in düt Johr. Bi düsse lütten Tallen kann een ja meist dat Wenen kriegen.

Nee, wenen wöllt wi nich. Wi hebbt en niege Auto köfft in’t verleden Johr, de Köök is frischmaakt – un ok dat Goorn-Möbelmang is nu vun’t Feinste! Dat is doch wat. Wi blievt tohuus un maakt uns dat kommodig. Wi sitt in’n Goorn un grillt un leest. Schöön is dat, wi sünd meist dorbi, uns al so richtig fein to verhalten.

 

Man dor kaamt de Kinner an un muult: dat is langwielig, se weet nich, wat se maken schöllt. „Ach Kinnerslüüd“, seggt wi, „nu laat uns doch mal en Ogenblick in Roh. Wi överleggt uns wat“.

Un denn biet wi in den suren Appel: wo föhrt an den Strand! Mit Sack un Pack, mit Badebüx un Bikini, mit Waterball un Swemmflögels, mit Sünnencreme un Strohhoot. Un ümmer noch mehr fallt uns in. De Kinner juucht un sleppt Speeltüüch an, dor is dat Enn vun weg. „En Anhänger hebbt wi aver nich!“ roop ik dortwüschen, as de Hupens jümmer grötter warrt. Un dat Eten un Drinken fehlt noch, un denn noch de Strandmuschel gegen den Wind, oha!

Is al meist Meddag, ehr dat wi uns op den Weg maakt Na, wenn wi man nu noch en örnlichen Platz to’n Sitten kriegt! Man eerstmal bruukt wi en Platz för uns Auto. De Strandidee hebbt mehr Lüüd hatt, so üm un bi 500 Autos tellt uns Jüngst in’t Vörbiföhren. Den allerletzten lüerlütten Platz hebbt wi denn tofaten – un nu geiht dat an’t Water mit all uns Packelaag. Wat wi dor nu beleevt hebbt, dat vertell ik en anner Mal.

Gröten vun de See seggt

Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen