zur Navigation springen

100 Sekunden Platt : Urlaubstieden

vom

Noch ist es zu früh, um in den Urlaub zu fahren. Aber Pläne schmiedet Marianne Ehlers schon mal.

shz.de von
erstellt am 22.02.2014 | 06:30 Uhr

Nee, noch is dat nich sowiet – mit den Urlaub, meen ik. Eerst in’n Sommer un in’n Harvst kann ik mi frienehmen. Ik weet ja ok noch gornich, wo ik hen will. Doch, Radföhren will ik, an de Oostsee lang, dat warrt schöön.

Also, dat gifft ja Lüüd, de sünd dree Weken lang op en Schipp. Op so een as in’t Fernsehn, so en Droomschipp. Dor musst du di en poormal an’n Dag ümtrecken – un dat gifft en Barg Eten un Drinken. Af un an gifft dat en Landgang, denn kickst du di Aapen un Löwen an – Karken oder wat anners Smuckes, je nadem wo du büst.

Dat weer mi veel to langwielig, ik glööv meist, dat is nix för mi. Kann ik ja maken, wenn ik oolt bün un mi nich mehr rögen kann.

Ik kunn mi ja ok twee Weken lang an’n Strand vun Teneriffa leggen un bruun warrn. Is mi ok nich na de Mütz – un goot för de Huut is dat ja ok nich.

Wat kunn ik noch? En Stadt bekieken, Wien, Rom, Paris? Dat is ja al mal wat Anners. Kunn ik över nadenken. Man wenn de Sünn schient, will ik lever buten ween. So en Stadt kunn ik ja mal in’n Winter besöken un denn en Tour dörch de Museen maken.

Wannern – ja, dor harr ik woll Lust to. Man denn dörv dat keen Regen geven, un to hitt schall dat ok nich ween. Un wohen – hier in Sleswig-Holsteen, lever in Tirol oder op Madeira? En swore Fraag!

Ik glööv, ik luer noch en beten af, dat Johr is ja noch lang. Un denn befraag ik toeerst mal mien Portemonai, ehr ik wat planen do. Villicht seggt dat ja glieks to mi: bliev du man beter tohuus un lees all dien Böker dörch, de du noch in’t Schapp stahn hest!

Noch keen Urlaubs-Gröten vun Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen